E causa di e blackout di 11 di mei ultimo ta un defecto den e conexion di cabel cu ta bay pa generador di turbina 6. Esey ta resultado di e investigacion di WEB Aruba cual entretanto a keda cla.
E defecto di kabel a trigger e sistema di proteccion di e generador, cu consecuencia cu esaki a stop di funciona. Generador di turbina 6 tawata regla e frecuencia pa por cumpli cu e demanda cu tawatin na e momento ey. E otro motornan, generador y turbinanan a purba carga e demanda pero no tawatin suficiente reserva, cual a conduci na interupcion total. Un sistema inteligente di maneho di planta, den futuro lo trece un suministro mas stabil y maneho mas rapido ora di blackout.
Unabes cu a haña sa kico tawata e causa di e interupcion, a logra coregi esaki mas pronto posibel. Entretanto a lanta e ekipo cu ta genera energia na WEB, cu ta e generador di emergencia, sigui pa e motornan RECIP, generador y turbinanan. Cada parti di e ekipo ta tuma su tempo pa cende, kenta y lanta produci. Pa evita un blackout di nobo, mester a reconecta e ekipo gradualmente. Pa e motibo ey no por suministra e isla completo cu coriente den un solo biaha.
Hopi ta e preguntanan con por a evita e blackout. E hecho cu parti di e ekipo, esta e generador y turbinanan, tin nan añanan ta hunga un rol. Cu su plan di mantencion, WEB Aruba ta percura pa e mashinnan aki haña nan debido mantencion y asina a logra cu e penultimo blackout a surgi na 2016.
Sinembargo no ta solamente mantencion ta hunga un rol. Operacion di e planta di energia te ainda pa gran parti ta sosode manualmente. Ta genera energia cu un combinacion di ekipo di generadornan, turbinanan, motornan RECIP y molinanan di biento. Diariamente operadornan di WEB Aruba ta maneha e planta manualmente. A base di e demanda di momento, mester dicidi cua ekipo por inicia na ki momento. Esey ta rekeri atencion constante, pero tambe habilidad casi sobrehumano pa dicidi rapidamente cua ekipo ta lanta na cua momento durante un desbalance entre demanda y suministro di coriente.
Den futuro cercano e sistema di IGMS lo trece cambio den esaki. E ‘Intelligent Generation Management System’ lo interconecta tur ekipo den e planta di generacion y asina regula e suministro automaticamente. E sistema inteligente por actua mas liher ora di interupcion y tambe lo mantene e suministro mas stabil.
A inicia ehecucion di e proyecto IGMS na 2016 cu e meta pa automatisa e sistema di control di generacion y den futuro, almacenahe di coriente. Implementa un sistema asina ta tuma su tempo. Mester a upgrade e sistemanan existente y tambe desaroya e software na midi pa interconecta nan. Tambe mester train empleadonan pa opera e sistema di control nobo. Segun planificacion e sistema di IGMS lo keda cla e aña aki.
IGMS ta forma parti di e combinacion di proyecto y inversionnan cu WEB Aruba ta bin ta haci, pa por ofrece awa y coriente na un manera confiabel, pagabel y sostenibel.
