Den un esfuerso pa enfrenta e problematica hopi serio di abuso sexual den nos comunidad, luna di april ta decreta como luna di conscientisacion y prevencion di abuso di mucha.
Esaki ta un paso importante pa reconoce e impacto negativo cu e abuso sexual tin riba nos muchanan y e urgencia pa preveni y confronta e situacion aki. Parlamentario di Fraccion di MEP, Darlaine Guedez-Erasmus, a remarca cu abuso sexual ta un topico cu ta hopi delicado y emocional den nos sociedad. E testimonionan personal di e victimanan ta pone den evidencia e efecto negativo cu e abuso sexual ta laga riba nan bida y e tristo consecuencianan cu ta afecta nan famianan. Pa haci un cambio real, mester ta comprometi na accionnan concreto pa proteha nos muchanan y castiga esunnan cu comete e abuso aki.
Dia 26 di juni 2020, Parlamento di Aruba a tuma paso firme pa fortifica e ley contra abuso di mucha door di aumenta 27 castigo den nos Codigo Penal. Aumento di delitonan contra moral (zedendelicten) manera violacion a bira di 12 pa aña 15 aña, relacion sexual cu un mucha bou di 12 aña a bira di 12 pa aña 15 aña, relacion sexual cu un mucha bou di 16 aña a bira di 8 pa aña 12 aña, agresion sexual cu abuso di autoridad a bira di 6 pa 8 aña, maltrato severo intencional cu consecuencia di morto a bira di 12 pa aña 20 aña y homicidio (doodslag) a bira di 15 pa aña 24 aña. E cambionan di castigo ta manda un mensahe cla: tur tipo abuso di mucha no ta tolera y tin su consecuencia serio.
Un aspecto crucial den e lucha contra e abuso sexual ta e investigacion. Den e ultimo añanan, a duna e atencion debido na e importancia di recopila evidencia pa garantisa un proceso hudicial eficaz. Accionnan manera e introduccion di e ‘vertouwensarts’, un medico forensico specialisa, y e certificacion di ‘zedenrechercheurs’ y psicologo pa trata ‘studieverhoor’ di e menornan. Tambe a busca tur material nobo pa diseña e ‘studioverhoorruimte’. Guedez-Erasmus a agrega cu ’recherchepsycholoog’ ta den preparacion y training. Esaki ta e pasonan den e direccion corecto.
Un otro asunto importante ta prevencion. Informacion y educacion ta clave pa proteha nos muchanan. Programa y maneho cu ta enfoca riba conscientisacion y prevencion di abuso sexual tin un rol critico den e lucha contra e fenomeno aki. Nan ta brinda e hermentnan necesario pa e mayor- y profesionalnan por reconoce e señalnan di abuso y actua na tempo y sa ki caminda pa cana.
E lucha contra abuso sexual ta un responsabilidad colectivo di nos comunidad, pero cu e prome responsabilidad ta cuminsa na cas. No solamente den luna di april, pero tur dia nos mester ta consciente di e importancia pa proteha nos muchanan y promove un ambiente unda nan por crece y prospera sin miedo ni perhuicio.
Parlamentario Darlaine Guedez-Erasmus ta di opinion cu ta solamente c’un esfuerso conhunto y continuo por duna importancia na conscientisacion, prevencion, y castigo cu e abuso sexual por ta confronta na tur nivel. Delito sexual no ta caduca. No ta importa cuanto tempo a pasa, si tin prueba, e victima por entrega keho pa asina e abusado haya su castigo, Guedez-Erasmus ta finalisa.
