Diabierna mainta Departamento di Labor (DAO) a tene un conferencia di prensa, unda a duna resultado di un encuesta haci na Aruba na final di aña pasa. E encuesta aki ta titula “Arbeidskrachtenonderzoek (AKO) 2018”.
Esaki tabata di ocho biaha cu DAO riba ordo di Minister di Asuntonan Social y Labor ta haci e encuesta laboral aki. DAO ta traha hunto Centraal Bureau Statistiek (CBS) y Banco Central di Aruba (CBA) pa realisa e ”arbeidskrachtenonderzoek (AKO). Esaki ta encuesta bou di famianan (viviendanan) na Aruba cu e meta pa midi e reciente desaroyonan riba mercado laboral. Indicadornan importante cu ta midi por medio di e AKO ta: cifra di desempleo, grandura y desaroyo di e poblacion laboral y igualmente di esnan cu ta buscando trabou y e grado di participacion.
AKO 2018 ta un investigacion grandi bou di e poblacion durante cual tambe ta recompila otro datonan di mercado laboral. A haci esaki den e periodo di 19 di october 2018 pa 15 di november 2018. DAO ta hopi gradicido na tur e famianan, encuestadornan y instancianan cu a duna nan contribucion na e exito di e AKO aki. Resultado Aki ta sigui e resultadonan mas importante di AKO 2018. E resultadonan aki ta wordo compara cu AKO 2017. E cifra di desempleo a conoce un caida di 8.9% den aña 2017 pa 7.3% den aña 2018. E caida den e cifra di desempleo tin mas tanto di haber cu reduccion di e hendenan cu no tin trabou. Na aña 2018 e cantidad di desempleadonan tabata 4068. Esaki ta un reduccion di 1048. Comparando cu otro paisnan den nos region, manera Corsou (13.4% na october 2018), St. Maarten (9.9% na september 2018), Barbados (11.4 porciento na juni 2017), Jamaica (8.7 porciento na october 2018) y Bahamas (10.7 porciento na november 2018), Aruba (7.3 porciento) ta banda di Barbados cu su 6.0 porciento na mei 2018, Cayman Island ( cu 2.8 porciento na september 2018) y Trinidad & Tobago (4.4 porciento na november 2017) e paisnan cu e cifranan di desempleo di mas abou.
Ora cu analisa e cifra di desempleo, segun sexo, ta resulta cu den hende hombernan, na 2018, esaki a baha for di 9.2% pa 7.4%, mientras cu e cifra di desempleo bou di hende muhe a baha di 8.6% pa 7.2%. Den un grafico cu a mustra den e conferencia di prensa por mira cu e poblacion trahando a crece te cu aña 2014. Den 2015 ta mira un caida. Pero na 2016 e cantidad di personanan buscando trabou a subi atrobe. Den e ultimo dos añanan (2017 y 2018) tin un leve caida. Den 2018 e cantidad di personanan trahando tabata 51.777.
