Trahadonan di SABA ainda no a haya nan placa cu ta data di 2002+

Trahadonan di SABA cu ta wardando nan promocion for di 2002, te ainda no ta mira un solucion pa haya nan pago. Esaki apesar cu Gobierno a haci e pagonan aki caba, pero e no a yega den nan mannan ainda.

Den combersacion cu Presidente di Arubaanse Bond voor werknemers in Verplegende instellingen (ABV), Gina Maduro, a splica cu sindicato ABV a drenta SABA na 2015 y a haya nan mes cu e problema aki cu ta data di 2002.

E ta un problema cu e trahadonan tabata sperando riba nan promocion, y adaptacion di nan salario manera mester ta. ABV a studia henter e trayecto pa mira con e trahadonan por haya nan placa. A haci diferente intento cu e Minister anterior y a logra haya un MB cu e empleadonan lo haya nan placa den tres aña pero na apertura di 2019 no a haya nada ainda.

Trahadonan di SABA ainda no a haya nan placa cu ta data di 2002+

Trahadonan di SABA ainda no a haya nan placa cu ta data di 2002+. Click link pa mas https://24ora.tv/32CTAwl

Posted by 24ora on Friday, July 19, 2019

A sigui un proceso unda cu ABV a sinta na mesa cu gerencia di SABA, kendenan ta bisa cu nan no a haya e placa ainda for di Gobierno pa paga e empleadonan. Minister encarga cu SABA, Dangui Oduber, di otro banda a informa e sindicato cu e placa a bay pa SABA. Esaki a causa tambe un paralisacion di negociacion pa un CAO nobo. Tanto sindicato como empleadonan kier pa soluciona e problema aki prome cu sigui pa e siguiente fase. “E no ta un bon ambiente pa nos negocia e CAO actualmente. Nos ta wardando tambe riba e calculacionnan cu mester wordo haci, ya cu cada aña cu no paga e suma ta keda subi.”

Ta den deliberacion cu Abogadonan tambe pa mira si ta hiba SABA Corte ya cu nan como doño di trabou mester haci e pago aki. E trahadonan a warda hopi caba y si no mira un solucion pronto, por spera diferente accionnan. “E trahadonan kier nan placa. Nan ta wardando nan placa for di 2002, y tin un MB caba cu ta bisa cu nan lo hay’e, ta logico cu nan no ta contento. Nan ta presenta na trabou, pero nan ta hopi disgusta.”