Ayera a tuma luga tratamento di e caso penal cu Ministerio Publico a entama contra Juancho Tromp, sospecha di lo a mishi cu dos mucha menor di edad tres aña pasa. Tata di e muchanan, Reginald Danies tabata den sala di Corte pa tratamento di e caso. Prome cu abogado defensor di Tromp a cuminsa cu su defensa, esta abogado mr. Chris Lejuez, e tata Reginald Danies a lansa un menasa serio contra dje publicamente for di tribuna.
Mesora e abogado a hala atencion di e Fiscal y Hues cu a scucha e menasa aki den sala di Corte, obstaculisando e pa por haci su trabao di abogado defensor den e caso aki. Despues di e caso, unda cu Fiscal mes a pidi “vrijspraak” pa e sospechoso debi ma tanto declaracionnan contradictorio den e investigacion, e abogado a haci un denuncia oficial na autoridad.
Reginald Danies no ta un desconoci den comunidad. E ta responsabel pa spuit tur rond di nos isla cu Aruba ta un pais “pro pedofiel”. El a haci esaki como protesta pasobra segun su opinion, e sistema hudicial no ta sirbi na Aruba y cu pedofielnan hopi biaha ta sali liber of ta haya masha poco castigo pa nan actonan. Esaki siendo cu e victimanan, e muchanan, ta keda marca y trauma pa resto di nan bida.
Cu e keho di menasa contra un abogado den funcion den sala di Corte, awor Reginald Danies ta confrontando un otro caso penal den su contra. Algun siman pasa Polis a drenta su cas y descubri marihuana pa cual a detene mesora.
