Dia 19 di februari, Dakota lo bay tin su Parada di Bario. Nan tin tres aña cu ta organisa. Tur aña e interes ta crece y e aña aki no ta un excepcion, segun John Lopez, miembro di e Comision Centro di Bario Dakota.
Nan tabata tin esun di scol, pero lastimamente mester a cancel’e. E evento lo ta un jump up di bario. Tur hende ta bon bini, tur hende por djis yega den e bario di Dakota. Si bo kier staciona bo auto den cura di Centro di Bario, no ta problema, no tin gasto cun’e.
E parada ta sali for di Centro di Bario, ta sigui pa e crusada di Mispelstraat/Pampunastraat, sigui pa Caya Papa Juan Pablo. Yega na e crusada, bira na man drechi, bay direccion p’abao te cu e caya di Druivenstraat y eynan ta yega Oleifistraat, despues sigui bay Benzinestraat, sigui bay den Caya Papa Juan Pablo, sigui pa Caya Juancho Kock y caba den Pampunastraat na Centro di Bario.
Bandanan cu a confirma ta NBO y tambe YX3M. Si ta posibel lo por tin mas banda cu kier participa y ta disponibel pa e anochi aki join, ta mas cu bon bini.
Pa mas informacion tin e pagina di Facebook di Centro di Bario Dakota. Nan por tira un bista, manda mensahe y lo contesta esaki mas rapido posibel. Ta e manera di mas facil pa tuma contacto.
Ta invita Aruba completo, Dakota en particular, sali for di cas un rato, para na banda. Si bo no ta di Dakota, bin toch. Jump Up ta un biaha pa aña ta haci esaki. Aruba, yega completo. E parada ta sali pa 8’or cuminsando na Centro di Bario Dakota y caba e mesun caminda.
