Diahuebs tres di mei ta start e prome parti di e curso ‘Basiscursus politieke vorming’ na Cas di Partido AVP na Playa. Cursonan ta riba diahuebs di 7 pa 9’or. E prome seccion ta trata nos Constitucion y e sistema Parlamentario.
E di dos parti cu ta enfoca riba Derechonan Fundamental y e Poder Hudicial ta start dia 7 di juni y ta riba tur diahuebs di luna di juni. E ultimo seccion ta trata Decision Gubernamental y Proteccion Civil Hudicial. E ultimo parti ta start dia 6 di september y ta termina dia 27 di september. E cursonan ta wordo duna door di mr. dr. Rycond Santos do Nascimento y mr. dr. Viola van Bogaert, ambos docente specialisa y doctora riba e tereno di ley constitucional.
Durante un conferencia di prensa lider di partido AVP mr. Mike Eman a splica un poco di e curso aki cu ta pa personanan cu tin interes y cu kier profundisa nan mes den gobernacion di Aruba y su sistema politico. Motibo principal pa brinda e curso importante aki ta cu durante e encuentro ‘1000Voz’ organisa pa Fundacion Digna Lacle-Herrera, e deseo di hopi Arubiano a bin dilanti cu nan kier engrandece nan conocimento riba e tereno specificio aki cu mas conocimento y capacidad politico pa por sirbi Aruba riba un nivel mas halto. Eman: “Tambe pa por garantisa e oportunidadnan di Aruba den un mundo cu pa nos isla tanto interno como externo ta bira mas compleho y unda condicionnan halto ta wordo exigi na tanto gobernacion como na norma y reglanan.”
Mr. dr. Rycond Santos do Nascimento a bisa cu p’e ta un honor di a haya e oportunidad pa ta parti di e curso aki.
“Mirando e desaroyonan politico mi ta orguyoso di por constata cu riba nos isla no tin espacio solamente pa confronta otro, pero cu tin espacio tambe pa union, pa dialogo y mas importante ainda ta cu nos ta pone nos pais na prome lugar.” Despues di a splica en corto di su trayectoria, Santos do Nascimento a bisa cu e ta tende hopi biaha con gobernantenan ta wordo critica djis pa critica. E ta haya cu esaki mester cambia. “Si bo tin critica, haci algo cu esaki y sirbi bo pais. Tin hopi forma con haci esaki. P.e. door di bira un politico y contribui di e forma aki na bo pais.
Tambe door di informa pueblo. Aruba tin derechonan fundamental manera libertad di expresion. Ta pesey el a tuma e reto pa duna e curso ‘Basiscursus politieke vorming’. Mi no ta bay bisa e cursista kico e mester haci, pero mi ta dune e hermentnan pa e husga pa su mes y yega na su propio conclusion.” El a splica tambe cu e idea tras di e curso aki no ta pa bo bira un fanatico, pero mas bien un ciudadano critico, un ciudadano cu kier hiba su isla dilanti y na un nivel mas halto. “Mi mensahe ta pa ban hunto haci un esfuerso pa informa nos mes mas miho, pa ta ciudadanonan critico cu kier sirbi nos pais.”
Ichelle Simon, miembro di Fundacion Digna Lacle-Herrera, a bisa di ta masha orguyoso di a haya les di mr.dr. Santos do Nascimento y mr.dr. Viola van Bogaert na Universidad di Aruba. “Mi ta un miembro orguyoso di Fundacion Digna Lacle-Herrera y di e forma aki contribui na desaroyo y formacion politico di nos pais.” Simon a haci un apelacion na esnan cu kier sigui e curso pa yena e formulario pa por participa. Esey por haci via medionan social of na Cas di Partido na Playa. “Corda cu semper ta necesario y esencial pa bo tin un conocimento amplio y un fundeshi firme na momento cu bo kier sirbi bo pais como politico. Esaki ta e oportunidad perfecto pa abo como hoben profesional cu kier sigui un carera den politica of riba otro tereno gubernamental, pa sigui e curso aki.”
