Durante campaña ta primiti di traha bienestar di nos pueblo di Aruba pero despues di forma gobierno ta lubida tur promesa cu a primiti na pueblo. Ayera nos por a sigui e comedia cu a wordo hunga den parlamento. Abase di critica kier hustifica nan maneho y kier tira culpa riba e gobierno anterior. Si e gobierno anterior a hasi malo ta bo deber awor cu bo ta den gobierno pa corrigi locual cu a bai malo. No por ta asina cu si e gobierno anterior a hasi malo cu esey ta dunabo e derecho pa hustifica bo mes pa hasi malo tambe.
Biniendo riba e contract cu a wordo firma cu Eagle LNG prome cu di 5 di November 2021 te ainda no tin claridad kiko a wordo firma y cu si berdaderamente lo ta na bienestar di nos pueblo den su totalidad. A discuti hopi den Parlamento pero ela keda solamente na palabra. A papia hopi y no bisa nada. Gobierno como doño di Utitlities NV mester por tin control di kiko ta pasa den e compania estatal. No tabata un secreto cu kier a retira e 2 directornan di WEB N.V. pa via nan no ta di acuerdo pa firma cu Eagle LNG. E prome stap a kita e director di Utilities N.V. y esey tabata bisto cu lo sigui pa e 2 directornan di WEB paso nan ta den caminda. Ora a caba di retiranan cu no tin strobacion mas ta pone nan hendenan cu si ta bai firma. No tin obstaculo mas. Asina ta pasa den paisnan socialista/comunista.
Pa medio di intermediario a hinca WEB N.V. den un debe di 700 millon florin. Un prestamo cu por a wordo hasi pa medio di WEB N.V. mes. Kiko tin tras di e procesonan aki? Cuanto porcentahe e intermediario ta gana pa e prestamo hasi? E intermediadiario no tin ningun responsabilidad. Antes segun mi a compronde prestamo tabata ta wordo hasi via AIB. E pregunta ta keda di con WEB N.V. mes no por a bin cu e systema di gas si ta esey nan tabata kier y cu na bienestar di henter Aruba? Web N.V. por a laga corre un tuberia for di waf di Barcadera pa WEB N.V. E tuberia aki no ta trese peliger pa ningun hende mientras esun cu mester sali for di San Nicolaas pa Balashi tin un trajectoria largo.
E acuerdo cu Eagle LNG ta pa 20 aña na suma di 20 miyon di dollar pa aña cu otro palabra mas di 1.6 biyon di dollar. Den su totalidad WEB N.V. tin 700 miyon florin na debe y ta mara na 2800 miyon florin den 20 aña. Awor mas cu nunca pueblo di Aruba tin e derecho di sa kiko ta e contenido di e contract aki.
E parlamentarionan tin e deber pa para duro pa e berdad sali na claridad. Bo no por defende un contract paso nan ta bisa cu e ta bon. Confiansa no tin mas una bez cu tur cos a bai scondi. Con parlamentarionan por duna nan opinion si nan no sa e contenido di e contract mas ainda pa por tin un votacion riba dje. E contract aki mester jega mas lihe cu ta possible Parlamento. Interes di pueblo mester bin na promer lugar y esaki ta deber di nos parlamentarionan pa cumpli cu ne. Nos di partido CURPA lo sigui vigila e proceso aki.
Lider di partido CURPA
Eric Ras
