Temporada di fin di aña a start sali cu varios evento special dedica na yama bonbini na nos dushi celebracion di Pasco y Aña Nobo manera ta nos so por hacie.
Y manera tur aña Centro di Bario Playa Pabao ta invita pueblo henter pa bin celebra ‘un anochi di Pasco pa famia den bario.’ E celebracion aki lo culmina dia 17 di december pa 7:00pm na Centro di Bario Playa Pabao mes y lo caba pa 10:00 pm.
Segun Dennis Burke, presidente di e centro, a comenta, e aña aki a haci algun cambio den e concepto. Ta trata aki di pone mas enfasis riba e muchanan. Pa esaki a pone, entre otro, un orario mas trempan di comienso y clausura pa asina tur mucha hunto cu nan famia por asisti y gosa di e actividadnan.
Lo bay tin presentacion di diferente grupo, entre otro, e orguyonan di e propio Playa Pabou, esta e grupo di gaita Maruba. Pa entretene e muchanan lo tin grupo di baile Candy Dancers y Energy in Motion. Tambe lo bay tin algun artista como invitado special, manera artista hubenil Ivy-Ann Brown, Lysann Ras y Stephanie Quant, kende lo bay duna un presentacion tambe.
Manera ta custumber, bar y cushina lo ta bon surti cu un menu extenso di Pasco cu, entre otro, aros y ham di Pasco, sanger yena y sopi di baca na prijs di famia.
Tin cu enfatisa cu e anochi aki ta pa famia, no solamente pa esunnan di Playa Pabao, pero Aruba en general. Asina Burke a invita un y tur pa pasa na Centro di Bario Playa Pabao diabierna awo pa 7:00 pm y disfruta un anochi ameno celebrando e dushi temporada di Pasco den bario!
