Remko Goeman di Van de Graaf Accountants a haci entrega di e cuenta anual di Arubahuis di e añanan 2014, 2015 y 2016 na demisionario Minister Plenipotenciario Juan David Yrausquin.
Pa tur e tres añanan Arubahuis a haya un “goedkeurende verklaring” cu ta nifica cu e cuentanan anual ta aproba pa un accountantskantoor. Tambe presente na e ocacion aki ta Judith Laclé, functionario di departamento di Finansas di Arubahuis. E mandatario a bisa di ta contento y satisfecho cu e cuentanan anual di Arubahuis a keda aproba pa Van de Graaf Accountants.
Esaki ta confirma un biaha mas cu Arubahuis ta sigi un maneho responsabel y den liñea cu presupuesto di pais Aruba. Sr. Yrausquin a gradici Remko y Van de Graaf Accountants pa nan bon trabao. Por ultimo Minister Yrausquin a bisa cu Van de Graaf Accountants lo cuminsa a corto plaso cu e control riba e cuenta anual pa 2017 cu esaki por keda cla den un periodo mas cortico.
