Angel Augusto Alvarez Colina y su ruman Juan Carlos Alvarez Colina ta culpabel di contrabanda cu hende y tambe contrabanda unda dos persona a fayece.
Esaki ta e sentencia di Corte den e caso di un biahe pa Aruba, scondi, cu tabatin resultado fatal pa dos pasahero. Sinembargo hues a bisa cu no tabata nan intencion di e dos acusadonan pa e hendenan muri. El a considera cu nan tabata negligente pasobra a haci e biahe den un boto chikito, sin iluminacion, sin ningun sistema di comunicacion y tampoco tabatin zwemvest abordo. Hues a bisa cu e ta tuma nan na malo pa esaki. Mas pasobra nan a haci esaki contra pago.
Pero e no ta haya e castigo pidi door di fiscal na su luga. E intencion no tabata nan morto pero si tabata negligente.Pa e motibo ey a impone pa e dos rumannan 48 luna, enbes di 10 aña. Esaki ta nifica 4 aña. Den e caso di Alvaro Luis Lopez Lugo e ta un poco diferente. E tabata un ayudante cu a yuda e pasaheronan ora nan tabata sinti malo durante e biahe y saca awa di e boto. Pues e no tabata organisador.P’e a impone un castigo di 48 luna di cual 12 luna ta condicional y 3 aña di prueba.Aunke cu Corte a baha e castigo pidi, e ta nifica cu nan mester bay cera toch pa un tempo y por a mira na nan cara cu nan lo a prefera pa deporta nan di Aruba.
ODISEA
E caso aki ta data di dia 20 di october, 2018, ora cu e grupo di mas o menos 20 persona a trata di yega Aruba den un lancha basta chikito. Cada uno a paga 600 dollar, segun mensahenan di bos y mensahe escrito cu a haya riba un celular confisca. Pero despues di un planeamento, esaki no a resulta bon, ya sea pa falta di informacion di costa di Aruba of lama bruto, a pega riba algun rif. Tur hende a bula na awa, keriendo cu e awa no t’asina profundo. Un a hoga cerca di e boto mes y e otro a hoga faltando algun meter pa yega costa. Di esnan cu a yega tera, rond di 10 a keda deteni.
