Dialuna, algo pasa di 3:35 di marduga, polis a mobilisa na un manera urgente riba e caminda principal di Tanki Leendert, pa un accidente frontal.
Cuater persona a resulta herida debi na e impacto y a pidi asistencia di ambulance pa asina atende e heridonan.
Segun investigacionnan haci con e accidente a tuma luga, polisnan a constata claramente cu un Nissan Skyline color shinishi tabata drift riba caminda bayendo nort. Debi na e velocidad super halto di e auto, esaki a perde control y a dal den lado contrario.
Aki ta caminda cu e Skyline a dal frontal den un otro Skyline cu tabata bayendo direccion zuid, cu e consecuencia ya menciona. A transporta tres herido pa hospital. Daño material ta hopi grandi. Polis a pone e chauffeur di e Skyline supla pa mira si e por tabata bebi, pero no tabata asina.
Pero si a detene pa motibo di a core un auto sin ningun documento y a causa accidente. Dogcatcher a bin na e sitio, pa asina transporta e detenido pa warda di Playa.
Takelwagen tabata tey presente tambe pa kita tur dos auto for di riba caminda, pa trafico por a sigui. A confisca e Skyline shinishi y transport’e pa warda di Balashi.