Awe mainta pa 9:00 am a inicia e reunion publico yama pa atende varios asunto, entre otro pa legalisa e pago haci na ciudadanonan door di Fondo di Asistencia Social di Emergencia (FASE). Un mayoria minimo di solamente 11 asiento, forma pa e dos fraccion cu ta forma coalicion, esta MEP y Raiz, a sostene e ley, mientras oposicion forma pa fraccion di AVP, MAS y Accion21 a vota contra cu 10 asiento. E votacion a sosode despues di mas cu 14 ora di reunion y suspension den sala di Parlamento.
Kico a legalisa?
Asina cu pandemia a yega Aruba na luna di maart 2020, su siguiente luna caba a haya riba 8 mil peticion pa sosten financiero na hende cu a perde trabou of perde entrada. Pero desde maart 2020 te awe, nunca e minister responsabel a bay Parlamento pa legalisa e pagonan haci. Esaki mientras cu na Corsou y Sint Maarten si a keda cla cu legalisacion di nan sosten den menos di un aña di tempo. Na tur a inverti como 79 miyon florin den FASE.
ARA y CAD a duna gobierno “onvoldoende”
Algemene Rekenkamer Aruba (ARA) y Centrale Accountants Dienstr (CAD) a emiti un rapport devastado, den cual ta señala un sin fin di erornan cometi dor di Minister Glenbert Croes y Minister Xiomara Maduro den henter e asunto aki. Ta parce cu tabata duna hende FASE segun nan mesun decision y sin cu tabatin un organo independiente di politica pa aproba of desaproba e peticionnan haci. A hunga politica cu placa di pueblo y awor a bira un problema serio.
Recomendacion di ARA
Algemene Rekenkamer a formula algun recomendacion cu ta conta pa tur minister. Asina ta recomenda pa percura pa registracion di datos bay na un manera uniforme, unda cu e intercambio y aliniacion di informacion entre departamentonan gubernamental ta un posibilidad. Tambe Algemene Rekenkamer ta recomenda pa tene cuenta cu alocacion di suficiente personal di diferente area di experticio, pa utilisa e checks & balances den forma optimal desde un inicio durante un proyecto similar.
Tocante FASE
A crea Fondo di Asistencia Social di Emergencia (FASE) na april 2020 y a keda paga te cu november 2021. Na aña 2020, pues entre april pa december, a paga un suma di 42,8 miyon florin, cu a sigui subi den 2021 ora cu a sigui contribui, aunke cu menos ciudadano riba e lista di sosten financiero. Minister Glenbert Croes a bisa cu orguyo cu Aruba ta e unico pais na mundo cu a bin cu un fondo asina y cu hasta IMF a elogia Gabinete Wever-Croes pa tabata asina rapido pa crea e fondo aki, pa evita cu hende lo a cay den miseria y hamber. Na inicio, ora a corta den salario di empleado publico y esunnan trahando na compania estatal, a bisa cu tabata pa contribui na FASE, locual a resulta despues di no tabata berdad. Cu a tarda pa bay Parlamento pa pasa e ley ta pasobra cu FASE nunca a existi, pues mester a crea un ley “from scratch”. Ta pensa di traha e ley di tal forma cu lo por aplic’e den futuro, si bolbe surgi un situacion similar den cual lo mester brinda sosten financiero na pueblo.
