A bati alarma pa un avion cu a sali for di Charlotte, North Carolina, na Merca rumbo pa Aruba. El a confronta problema cu motor durante vuelo yegando Aruba, pa cual el a bati alarma y a activa tur autoridad pa brinda asistencia. Kico a sosode ainda no ta conoci, pero e motor a duna señal di problema y durante aterisahe a constata huma y candela den un banda di motor. Por lo menos un vuelo mas di American Airlines desvia debi na e emergencia aki. Vuelo programa pa yega awe nochi 9:00 pm lo yega cu un restraso di mey ora.
Pa exactamente 3:50 pm a notifica autoridad pa mobilisa tur departamento concerni pa un alarma grandi na aeropuerto di Aruba debi na un avion di American Airlines bahando cu problema cu motor. Pa 3:53 pm e avion a aterisa y 3:54 pm a meldo cu ta mira huma y candela saliendo for di motor # 1 di e avion. Pa 3:54 pm e prome unidad di bombero a yega na e avion. Un total di tres unidad di brandweer a brinda asistencia. Pa 4:02 a informa toren cu e pista ta “clear” y cu por a habri aeropuerto bek pa operacion regular.
Segun informacion, tabata trata di un avion Airbus-321 di American Airlines cu registracion N155UW cu tabata biniendo for di Charlotte, cu number di vuelo 874 y tabata programa pa baha na Aruba pa 3:07 pm. E avion a baha finalmente pa 3:52 pm. E avion a confronta problema cu un banda di motor, cu a cay completamente afo.
Brandweer, polis como tambe Marechaussee tabata presente y a prepara pa cualkier calamidad cu por a presenta na momento di su bahada. Afortunadamente e aterisahe a bay bon, aunke cu e motor a pega na candela. Pero paden, no tabatin ningun eventualidad cu niun pasahero, otro di e susto!
A baha tur pasahero for di avion mientras a sigura cu e situacion tabata bou di control.
