Na aña 2021, Aruba Tourism Authority (ATA) a anuncia e programa ‘Aruba Signature Experiences’ cu meta pa stimula desaroyo di experiencianan nobo den diferente ‘niche’ cu por atrae mas turista y genera mas entrada pa nos isla y na mes momento tin un impacto mas abou riba nos medio ambiente. Na aña 2022 a anuncia e prome rond di participantenan cu a gana y e siguiente rond e cuminsa den september 2022.
A.T.A. y Qredits Aruba a invita personanan cu kier bira entrepreneur of ta entrepreneur caba, cu tin un idea innovativo pa un experiencia unico den e areanan di romance, bienestar, eco-turismo, of cultura, pa participa den e programa aki. Entrepreneurnan a participa na e Small Business Academy di Qredits Aruba, unda cu nan a siña diferente habilidadnan necesario pa cuminsa y maneha nan propio negoshi. Despues di completa e curso aki e entrepreneur por a sigui na e siguiente stap cu ta aplica pa financiamento na Qredits Aruba.
Entre e participantenan a selecta e ganadonan cu a ricibi como premio e sosten di Aruba Tourism Authority cu fondonan, recursonan y guia personalisa, pa asina promove nan producto of servicio unico na nos bishitantenan. Basa riba criterianan manera; con unico e experiencia ta, si ta cumpli cu regla di ROPV, e nivel di ‘High value- Low impact’ y si por ta operacional den maximo seis luna, a scoge dos (2) ganado.
Ambos ganado ta enfoca riba e ‘niche’ di bienestar/ ‘wellness’. A.T.A. ta contento di anuncia e siguiente ganadonan di ‘Aruba Signature Experiences’. Un pabien ta bay na Ryan Leliendal, Gianina de Freytas di Dimondi, Nannelle van der Spil y Jerome van der Spil di Transition 2 Health.
E siguiente parti di e programa ta inclui sesionnan cu un consultant di ‘Business IQ’ cu ta specialisa den e area di ‘niche’ pa asina brinda ayudo na e ganadonan, ofreciendonan e sosten pa asina finalisa e detayenan pa haci e ideanan aki aun mas exitoso. A.T.A. lo asisti nan tambe den e parti promocional pa asina resalta visualmente cu contenido relevante y unico. Lo sigui tambe brinda apoyo na e ganadonan
den area di mercadeo.
Expectativa y necesidad di bishitantenan a cambia den transcurso di e ultimo añanan unda bishitantenan ta mas enfoca riba experiencianan unico. Despues di e pandemia esaki a bira mas importante ainda ya cu mas hende ta considera vakantienan como oportunidadnan pa crea recuerdonan inolvidabel hunto cu nan sernan keri.
