Durante e temporada di pandemia, Aruba mester a fia placa cerca Hulanda, cu na su turno a pone como condicion pa bin c’un recorte di 60 miyon florin den cuido medico.
Pero esaki awo ta algo pa pasado, en bista cu Gobierno di Aruba a elimina e recorte. Esaki ta nifica cu entrante prome di mei, tur cuido cu e Organo Ehecutivo cumpra pa su aseguradonan, ta sin e recorte. Asina Director di AZV, ing. Edwin Jacobs, a cuminsa ta bisa. El a enfatisa cu e dunado di cuido lo ripara esaki den luna di juni, ora cu AZV paga compra di servicio di luna di mei.
No tabata un decision facil, Jacobs a sigui bisa. Huridicamente e tabata tin su problemanan pa sigui mantene. E sostenibilidad huridico di e recorte aki tabata tin hopi duda riba dje. Pa AZV tampoco ta facil. Minister di Salud Publico a informa AZV, e aña aki nan tin un blafon pa loke ta e gastonan di AZV di 474.5 miyon florin. Ta den e espacio aki lo mester busca e manera pa duan bek n’e sector di cuido, e 5.5% aki, ademas financia e reformanan cu mester sigui traha riba dje, pa garantisa cuido pa futuro.
