Diabierna ultimo tabata Dia Mundial di Webo. Riba e dia peculiar aki ta enfoca riba su relevancia na nos dieet alimenticio, su bentaha y beneficionan cu e ta proporciona na nutricion y salud. Tambe na Aruba e tabata un bon momento pa conscientisa publico riba e importancia pa sostene nos productonan local.
Claro cu ora yega den un supermercado, tin opcion cua webo ta cumpra. Tin esunnan cu ta bin di afo, conoci den boc’i pueblo como “web’i ijs” pasobra ta procesa nan y ta trece nan friu den container pa bende aki. Pa e webo por dura mas largo, ta uza ingredientenan adicional cu e galiñanan cu no tur hende ta gusta. E ta un poco mas barata kisas, pero no ta fresco y mayoria bes mas chikito cu e webo crioyo.
Mas interes awendia
Por lo menos un di e criadonan di galiña a sigura nos cu awendia e interes pa cria galiña pa produci webo a crece enormemente. Siendo esun di mas grandi, Cunucu Aruba Dushi Tera a cuminsa por lo menos ocho aña pasa. “Nos a cuminsa chikito y segun nos a siña di nos erornan, pocopoco a bay dilanti”, asina e conocido mr. David Kock a conta. Awendia nan tin mas di 10 mil galiña y tin henter un operacion pa produccion di webo.
No ta facil cria galiña na Aruba
E ultimo añanan e criadonan di galiña a haci apelacion na gobierno pa por logra haya mas sosten, pero ainda no a logra. Prijs di awa na Aruba ta hopi halto compara cu e region, mescos tambe ta importacion di cuminda di galiña. Ta bon pa nos realisa cu ora ta referi na cria di miles di galiña, cu no ta un saco di cuminda ta cumpra, sino container di cuminda ta importa di afo. E ta bin cu su gastonan y pio awo cu prijs di carga a subi drasticamente. Prijs pa haci negoshi na Aruba ta mas halto cu den region, pues esey riba su mes tampoco ta yuda. Esey mes por ta contesta riba e pregunta dicon e webo di ijs ta un poco mas barata cu esun di Aruba, debi cu nan ta produci hopi mas cu nos, na prijs mas abou y cu mas opcion.
Pero pueblo tambe por sostene
Separa di gobierno cu por duna incentivonan fiscal pa e criadonan di bestia, publico tambe por corda cu sosteniendo negoshinan chikito y local, ta duna un empuhe directo na nos economia. Separa cu bo ta come un webo fresco sin cu a añadi nada na cuminda di e galiñanan, tambe bo ta aporta na nos economia y na cria di cupo di trabou local. E pandemia a siña nos algun asunto interesante: Si nos mes no sostene of kere den nos mes, ta ken si lo kere y sostene nos anto?
