Dia 30 di october Aruba 297 Cubs Power Travel Team lo tin un evento pa recaudacion di fondo, cu ta un bingo.
Charles Rafini,Manager di e ekipo aki, a indica cu esaki ta via Bingo Aruba y lo pas’e na Canal 48. Esaki ta e prome evento pa recauda fondo pa nan por bay Miami. E situacion no ta facil, ya cu e ekipo ta consisti di varios otro ekipo. Nan no por train tur ora, den fin di siman nan tin wega cu nan mesun ekipo y durante siman e muchanan ta train cu nan mesun ekipo. Pero a probecha e temporada di vakantie pa por a train hunto y tambe nan tabata tin un wega di fogeo contra Hammer Sharks, pa nan por hinca e ekipo den otro pa nan prepara pa bay afo.
Nan lo ta saliendo pa Miami pa un competencia cu lo ta di 30 di juli te cu 6 di augustus. Ta poni pa hunga sigura 4 wega. Si keda den e dos miho nan di e pool, ta sigui pa e siguiente ronda, por hunga te cu shete wega si yega te final. Ta trata di ekipo di beisbol den categoria U12.
Diadomingo a tuma luga e di tres training, pero door cu Rafini tabata umpire pa basta aña, coach pa paar di aña y por wak un animo hopi mas grandi. Union entre e muchanan lo haci cu nan ta miho prepara pa nan weganan na Miami.
Rafini lo no haci mucho cambio den e manera di hunga di e muchanan, pero lo haci algun ahustacion riba esunnan cu nan coachnan mes ta haci cu nan.
Tin basta mayor cu ta hopi uni, cual ta hopi importante. Tin un comision di mayor, cu door ta trempan, ainda nan no a echt cuminsa cana busca sponsor. Pero si nan a cuminsa traha pocopoco caba riba preparacion di e muchanan, aunke e situacion ta dificil pa haya sponsor aworaki den temporada di pandemia.
Tur sponsor cu lo kier contribui cu algo pa haci e biahe di e muchanan posibel, pro tuma contacto cu Charles Rafini, Jr, na 569-5490. Tur sponsor automaticamente ta bon bini. Esun cu kier cumpra bingo, ta mas cu welcome. Ta trece e carchi te den porta di cas di e cumprado.
Por ultimo a gradici Bingo Aruba pa e oportunidad y e yudansa pa asina haci e evento aki posibel pa cuminsa recauda fondo pa e muchanan por haci e biahe pa Miami posibel.
