Crea bo propio realidad cu arte abstracto na Cas di Cultura

385

Entrante dia 28 di september, Soul2Soul-Mindful Art Gallery ta facilitando un serie di tayer di Mindful Art di 3 dia na Cas di Cultura. Cu Mindful Arte, e participantenan di e tayernan ta destress y crea nan propio realidad na e mesun momento cu nan ta desafia nan mes di un manera dibertido pa traha den nan autodesaroyo.
Dia 1 di october, e participantenan por presenta nan arte traha pa nan mes na e publico den e exposicion di arte “The essence of me” hunto cu obranan di arte exhibi pa e artista abstracto local, Sharina Gumbs.

Exposicion di Arte Abstracto “Essence of me”

E exposicion “The essence of me”, cu lo tuma luga dia 1 di october, ta un representacion di e obra di e artista abstracto local, Sharina Gumbs. E participantenan di e tayernan tambe lo exhibi nan obranan di arte y nan lo por comparti nan experiencia cu un audiencia di famia, amigo y otro amantenan di arte.
E entradanan pa e exposicion y tayernan ta disponibel na Cas di Cultura of atrabes di Soul2Soul Mindful Art Gallery (7491217).

Disfruta di arte abstracto riba diferente nivel

Durante e temponan estresante aki caminda cu personanan no ta sigur riba futuro, por ta hopi util siña con arte por yuda libera e stress, creando su propio realidad den un obra di arte abstracto.
E prome tayer dia 28 di september ta “Refill your cup with authenticity”, ganado di e premio cultural “De Gouden C” 2019 na Hulanda. Den e tayer aki ta crea artificialmente un momento estresante y e participantenan tin e reto di reflexiona riba con ta enfrenta situacionnan inespera. Mientras tanto, nan ta siña habilidadnan basico pa haci un bunita obra di arte abstracto

“Reality-Check” ta e di dos tayer dia 29 di september y tin como obhetivo desafia nos propio creencianan fundamental, nos tin e poder di crea y reforma nos propio realidad. Y haciendo esaki, nos ta recupera algun tipo di control riba nos bidanan, door di enfrenta na factornan externo cu ta impacta nos.

“Design your personality” ta e ultimo tayer dia 30 di september. Den e tayer aki, e participantenan ta uza un dryfit shirt como canvas y ta expresa nan personalidad unico den un obra di arte abstracto cu nan por uza.