Corte a dicidi cu e peticion cu Gerrit Schotte a haci na Hoger Beroep riba su asiento den Staten cu el a perde, no tin base. E decision aki a wordo anuncia door di Corte den oranan di mainta.
Dia 27 di november ultimo Fiscal Mayor di Corsou a informa Presidente di Staten cu riba e dia ey e condena di Schotte na tres aña di prizon a bira definitivo. E mesun dia e Presidente di Staten a informa Schotte cu el a stop di ta miembro di Staten y mesora el a dicidi di bay Hoger Beroep riba e decision aki. Despues cu e caso a wordo trata dia 18 di januari ultimo, e decision a cay awe mainta.
E ex mandatario a trata di haci uzo di diferente instrumento legal, entre otro cu e LvIS no a drenta na vigor ainda y no ta duna base pa bisa ki ora su miembrecia den Parlamento ta wordo kita. Pero Huesnan a bisa cu articulo 60B cu tin di y haber cu e tema aki, a drenta na vigor dia 16 di september, 2010, cu e otro cambionan den Statuut cu a wordo haci via di un Rijkswet.
Su Abogado tambe tabata di opinion cu su sentencia no ta “irrevocabel” caba pasobra ainda nan tin caminda pa cana cu e sentencia aki, entre otro door di acudi pa entrega un “klacht” riba su condena na Europees Hof voor di rechten van de Mens (EHRM) y “Het Mensentechten Commissie van de Verenigde Naties”. Aunke cu esakinan no ta un herment legal normal contra un condena penal, pero si e decision wordo tuma cu a viola tratado, e ora Reino Hulandes a base di articulo 46, prome inciso, di e tratado menciona ta obliga pa drecha e situacion na e forma prome cu e violacion di derecho a tuma luga. Pero e ponencia aki tambe a wordo rechasa door di Hof.
Nan ta splica cu e sentencia di dia di tres aña a bira irevocabel cu e arrest di dia 27 di november, 2018. No tin ningun otro herment legal mas pa cana. E no a haci uzo ainda di su derecho pa acudi cerca EHRM y leynan di esaki no ta bisa cu si un denuncia wordo entrega na EHRM, e sentencia cu ta “onherroepelijk” mester wordo wanta. E unico cos cu e ta bisa cu un Estado no mag stroba e investigacion riba e posibel violacion di derecho humano.
Tur esaki a conduci cu e Hoger Beroep no tin base y decision cu e no ta miembro di Parlamento mas ta keda valido!
