Kiko ta e ròl di “Bureau Telecommunicatie, Post & Utiliteit” den kuadro di servisio di internèt na Kòrsou. Charles Cooper ku tabata e promé minister enkargá ku telekomunikashon den pais Kòrsou i aktualmente parlamentario a analisá e situashon di siguiente forma.
BTP&U ta e reguladó di telekomunikashon, pòst, energia, tarifanan di airopuerto i tarifanan di sektor di salú. BTP&U mester tene kuenta e normativa legal aplikabel (inkluí e konseshon, outorisashon, lisensia emití) i e maneho establesé pa e sektor. BTP&U den su ròl di supervisor ta responsabel pa e regulashon legal, ekonómiko i tékniko.
Telekomunikashon
Den último dianan, tabatin hopi keho di pueblo pa e kalidat malu di e servisio di internèt ku Flow/UTS ta ofresé. E direktor di BTP&U a indiká den medionan di komunikashon ku nan no por hasi nada ya ku ainda no tin un ordenansa nashonal nobo di telekomunikashon, loke ta nifiká ku BTP&U no por aktua. Riba e base di e komunikashon di supervishon aki BTP&U, frakshon di MFK a hasi su propio investigashon i a yega na siguiente konklushon.
Ordenansa nashonal riba instalashonnan di telekomunikashon
Cooper ta splika ku e ordenansa nashonal riba instalashonnan di telekomunikashon a keda establesé pa promé bia na 1994. Despues e ordenansa nashonal a keda adaptá dia 1e di yanüari 1996. Segun e ordenansa aki, empresanan por opta pa un konseshon pa konstruí, mantené i mantené un infrastruktura di telekomunikashon. Eksplot’é pa asina ofresé servisionan. Gobièrnu a duna konseshon na empresanan di telekomunikashon. E konseshonnan aki ta kontené kondishonnan legal, ekonómiko i téknikanan ku mester kumpli kuné.
E empresanan di telekomunikashon ta supervisá pa BTP&U.
BTP&U mester verifiká ku e empresanan ta kumpli ku e ordenansa nashonal i e kondishonnan di konseshon. BTP&U mester sòru ku esun ku tin konseshon ta konstruí un infrastruktura di telekomunikashon “state òf the art” pa ofresé telefòn, internèt i òf servisio di televishon via di esaki. Segun añanan a pasa BTP&U semper a establesé rekisitonan estrikto pa e parameter tékniko ku tambe ta apliká na nivel internashonal, ku e fin di garantisá e kalidat di infrastruktura i e servisionan.
Segun e ordenansa nashonal vigente, e servisionan di internèt ta servisionan LIBER (no regulá), pero e servisionan di internèt ta ofresé riba e infrastruktura di telekomunikashon ku ta regulá. I p’esei MFK no por komprondé dikon BTP&U direpente no por, manera semper tabata e kaso, supervisá e kalidat di infrastruktura
di Flow/UTS. Tur e konseshonarionan ta konta ku KPI (Key Performance Indicators) i stándarnan tékniko ku ta keda apliká na e infrastruktura riba kual ta ofresé e servisionan di telefòn, internèt, televishon.
Segun e dekreto nashonal riba instalashonnan radio eléktriko, e infrastruktura di telekomunikashon mester keda inspekshona kada 5 aña i si surgi problema ta nesesario un inspekshon intermedio pa parti di BTP&U. Segun frakshon di MFK, BTP&U mester supervisá e empresanan di telekomunikashon riba e base di lei i regulashon vigente.
No ta nesesario warda un ordenansa nashonal nobo pa telekomunikashon, e ordenansa nobo ta un solushon pa hasi servisionan nobo posibel. Sr. Cooper ta pidi minister di VVRP pa instruí BTP&U pa nan hasi nan tarea di supervishon, klientenan ta paga pa haña bon servisio.
Kòrsou 8 di òktober 2020,
