Durante conferencia di prensa di Minister di Salud Publico, Turismo y Deporte, Dangui Oduber diabierna ultimo, el a informa cu Aruba ta asina leu y prepara pa dialuna awor por duna inicio na e siguiente Fase di recuperacion y futuro di Aruba. E strategia di Gobierno a funciona y a logra di “Crash the Curve” di Covid 19 y por cuminsa habri poco poco e economia y bida social na Aruba. Esaki ta bay segun plan traha y e protocolnan anuncia.
Ta cancela tanto e Shelter in place como tambe e Samenscholings verbod entrante dialuna, e limitacion di cantidad di hende den un establecimento tambe ta cancela. Scolnan tambe por cuminsa, specialmente despues cu a tene mainta di informacion pa maestronan y anochi di informacion pa mayornan.
DVG, HAVA, HOH y JGZ a duna splicacion amplio cu e virus no ta ser transmiti den nos comunidad. Na Aruba ya a pasa mas cu 26 dia sin tin transmision di e virus y segun investigacion di RIVM y WHO, tur cos ta mustra cu e mucha ta safe cu e virus no ta ser transmiti entre mucha cu mucha, pues no tin mester di tene distanciamento fisico-social bao di muchanan.
Pa loke ta maestronan si ta ser indica pa nan sigui estrictamente e reglanan di protocol pa loke ta distanciamento fisico-social y higiena. Varios scol cu ya a prepara y ta cla lo cuminsa dialuna caba cu nan klasnan, scolnan cu no ta cla ainda tin un siman pa keda cla cu nan preparacionnan. Gobierno ta spera si cu pa dia 25 di mei tur scol ta cla cu nan preparacionnan pa asina tur por habri.
Entrante dialuna proyectonan di construccion cu a para awor lo por sigui, centronan comercial, misa, tempelnan y cinemas por habri bek y sigui cu nan actividadnan.
Pa loke ta trata deporte, training di deporte di ekipo cu ta hunga pafo por cuminsa pero deporte di contacto si ainda no. Den e parti 2 di Fase 2 cual ta cuminsa dia 25 di mei, crashnan y Tra’i merdia lo por cuminsa opera, restaurantnan cu ta sirbi cuminda pa su huespednan den patio pafo por habri, e restaurantnan mester cumpli cu e protocol estableci y mester tin un seyo di Clean Seal Certification program di ATA y Departamento di Salud. Bar Restaurant no ta bin na remarca pa habri dia 25 ainda. Tambe salon di beyesa y barber lo por habri dia 25 di mei. Spa, Bar Restaurant, Casino ainda no ta habri y eventonan publico tampoco por tuma lugar ainda.
Gobierno di Aruba ta spera cu tur establecimento cu ta na turno pa habri sigui e reglanan di e protocolnan di e Normal Nobo na trabao estableci pa DVG. Pa mas informacion por download e protocolnan na www.arubacovid19.org. Lo tin control di Taskforce pa percura pa tur instancia ta cumpli.
