Recientemente Gabinete Wever-Croes a anuncia, den un ceremonia cataloga como un evento politico den Renaissance Convention Center, cu a kibra e contract cu Canadian Bank Note pa maneha y organisa loteria pa Fundacion Lotto pa Deporte. E contract, cu ta existi pa hopi aña caba y cu algun aña pasa Minister Alex Schwengle a revis’e, atrobe lo conoce un revision of kiebro. Gobierno a papia di kibra e contract mientras cu otro parlamentarionan ta papia di cambia e contract den cual mas placa ta keda Aruba y menos ta bay Canada.
Team negociado
Minister Endy Croes hunto cu Conseho di Minister, a instala un comision cu tin como tarea pa negocia cu Canadian Bank Note y purba tur manera pa kibra e contract cu nan. E ekipo aki ta consisti di ex-minister y actual consehero di Minister Dangui Oduber, esta mr. Andin Bikker. Tambe a inclui den e comision abogado y alabes consehero di Minister Dangui Oduber, esta mr. Arlene Ellis-Schipper. A acerca tambe abogado y alabes consehero di Conseho di Minister riba varios caso y proyecto, esta mr. Anthony Ruiz di e Bufete Croes, Wever & Ruiz. Den e comision nan ta conta cu e experticio tambe di ex-bankero Alwyn Lin, consehero di minister y tabata traha na Bufete Croes, Wever & Ruiz. E ta un candidato awo pa maneha Fundacion Facilidadnan Deportivo pa e mesun Minister Endy Croes. Tambe e dos miembronan di Hunta di Supervision di Fundacion Lotto pa Deporte, esta Robert Maduro y Kenneth Bikker hunto cu e director interino di Fundacion Lotto pa Deporte, esta Junny Figaroa.
Pa lesa e articulo completo, lesa e edicion di TREMPAN di awe.
