Si bo no tin nada pa haya di gobierno, si bo no tin un permiso pa haya, si bo no tin un fabor pa gobierno haci pa Bo y Bo ta contribui na campaña, bo no ta hinca bo mes den un riesgo, cu mañan nan por bisa cu b’a haci’e pa e vergunning of ontheffing. Pero den caso cu Bo duna y despues haya bek, husticia por mira esey como un fabor of hasta como soborno!
Awor aki tin persona cu a yuda cumpra carchi, por ehempel pa un evento, cu nan ta haya nan den e problema, pasobra nan a pidi pa un ontheffing, siendo cu e ontheffing no tin nada di haber pa e parti cu nan a cumpra pa yuda e politico of a simplemente atende un evento. Nan a gusta e concierto, nan a cumpra carchi pa bay concierto. Pa casualidad nan tambe lo tabatin un ontheffing pidi cu a hinca nan den problema.
Fiscal a bisa atrobe cu ta importante pa e hendenan na Aruba compronde, cu si bo tin algo pa haya di gobierno, no bay duna placa zomaar, pasobra bo por hayabo den problema. Si bo no tin nada pa haya, por ta, bo por duna mas facil.
E cultura di Aruba ta cu no ta haci mucho distincion entre e dos cosnan aki. Si bo ta duna libremente of posiblemente bo tin algo pa haya tambe. Si bo no tin nada pa haya di gobierno of di e politico tambe, bo por duna libremente, bo no ta buscando nada. Pero si bo tin algo cu bo por haya of kier haya of lo haya, bo tin cu tene cuidao!
Abogado Chris Lejuez a comenta cu e ley di financiele politieke partijen por yuda trece claridad den esaki. Mester di claridad ki ora si tin mag y ki ora no tin mag. No tin e claridad aki na Aruba y hopi hende por bira victima di esey.
