Na Aruba ta recordando e di 56 aña di existencia di e celebracion di Dia di Portugal, Dia di Luis Vas de Camoes y Dia di Comunidad Portugues rond mundo, cu na aña 1965 unda Aventura Quimarais a tuma e iniciativa pa e tempo ey celebra dia di Portugal conhuntamente cu un grupo di Portugues na Aruba. E celebracion a cuminsa cu un marcha saliendo for di cas di Aventura riba Wilhelminastraat pa Wilhelmina Park.
E grupo di Portugues aki den un forma hopi emocional a bin hunto p’asina gradici Aruba pa e bon aceptacion di e Portuguesnan na Aruba.
Portuguesnan ta conoci di ta hende cu ta traha duro y lucha te na final. Nan a contribui na economia di Aruba den añanan 65, 70 y 80. Tambe nan tabata haci trabounan duro y pisa.
Portugues tabata busca un futuro pa nan famia y no ta importa e trabou. Pa nan tabata mas importante e dignidad pa tin un trabou y cu un dia nan lo logra.
Pa algun di nan, esaki tabata un cos no mucho bon pa haci, pero a sali fo’i nan pais pa traha y gana algo pa bay cas bek cu ne y no pa keda semper. Esaki tabata e deseo di mayoria di nan. Pero na caminda cosnan a cambia.
Asina a sosode cu Portuguesnan poco poco tambe a cuminsa integra den e sociedad di Aruba na unda nan a eherce diferente funcion den comunidad, educa nan famia y ainda nan ta aki y dera na e dushi isla aki Aruba.
Nan exito ta sin duda su capacidad di adapta den diferente ambiente mientras cu na e mesun momento mantene bibo y practica e balornan di su origennan.
Y p’esey ta gradici ARUBA un biaha mas pa acepta Portuguesnan.
Diahuebs, dia 10 di juni, pa 6:30 pm lo celebra santo sacrificio di Misa na Misa di Fatima na Dakota, den cuadro cu e celebracion di Dia Nacional di Portugal.
Invitacion special ta bay pa e comunidad Portugues pa asisti y tambe tur otro comunidad.
Directiva di FSCP Club Primavera ta desea un feliz dia di Portugal na tur e Portuguesnan residencia aki na Aruba, un dia cu ta recorda tambe e reisnan di nan identidad propio y tambe unda orguyoso di forma parti di e isla aki y ainda nos ta parti di e desaroyo di Aruba.
Celebracion ta sigui diadomingo, dia 14 di juni, bendemento di cuminda tipico Portugues pa recauda fondo pa cubri gastonan di e club for di 12’or pa 3’or di atardi na Club Primavera lo tin diferente cuminda nan tradicional Portugues manera Bacalhau y Espetada a Portguesa. Pa esunnan interesa por contact miembro di directiva pa ticket Telefon 5935299-5946460
