Durante un ceremonia cortico militar, ‘Compagnie in de West rotacion 40’ awe a pasa su tareanan pa e siguiente unidad, rotacion 41. Mediante e tradicional asina yama ‘peddeloverdracht’ – pasa over e rema, e Comandante nobo Capitan Martijn Huis in ‘t Veld a releva su antecesor Mayor Rian van der Meer. Rotacion 41 ta keda 4 luna den Region Caribe. E ‘compagnie’ di soldanan Alfa ‘Java’ no ta uno desconoci den e region.
Na 2017 tambe nan tabatin e tarea di Compagnie di ehercito den Region Caribe. Durante esaki, nan a duna asistencia na Sint Maarten prome, durante y despues di Horcan Irma.
Mayor van der Meer ta mira bek riba un periodo special: ”Como unidad nos tabatin un tempo fantastico akinan.
Nos por a haci e loke cu nos a bini p’e y a sinti nos masha bonbini riba e pida parti special aki di nos Reino.”
E unidad saliente durante e ultimo lunanan, ademas di training, tambe a brinda un cantidad di apoyo na autoridadnan local. E apoyo na autoridad civil ta un di e tareanan principal di Defensa den Region Caribe.
Capitan Huis in ’t Veld ta anticipa pa por train cu su hendenan den Region Caribe Hulandes. “E Compagnie ‘Java’ ta honra, pa un biaha mas, por ta huesped na Corsou. Nos ta anticipa, cu uzando nos mentalidad ‘Nos Por’, nos por brinda apoyo y asistencia caminda ta necesario.
Banda di esey nos lo probecha nos periodo na Corsou, pa train pa asina den e añanan venidero nos por ta semper cla, pa cualke despliegue cu presenta.”
CidW 41 ta procedente di batayon 12 di Infanteria Regimento van Heutsz, un unidad di Brigada Aeromobil 11. ‘Compagnie in de West’ (CidW) ta un unidad permanente di Forsanan Arma Real den Region Caribe, cu por keda desplega durante un variedad di tarea. E intencion ta cu durante e cuater lunanan venidero nan train tanto na Aruba, Bonaire como Corsou.
