Diamars Republica Dominicana a conmemora e 180 aña di su independencia. Aki na Aruba tambe e colonia Dominicano a celebra esaki.
Den oranan di mainta, Consul General di Republica Dominicana, Luis Eludis Perez hunto cu su compatriotanan y tambe algun dignatario presente a pone un ofrenda floral na busto di Juan Pablo Duarte, tata di independencia di e pais. Tambe tabata presente, Minister di Integracion, Glenbert Croes, cu semper tabata uni man den man cu e colonia Dominicana.
Perez a indica cu e dia aki, a laga un banda tur creencia religioso of politico, pero a uni como un solo comunidad pa asina celebra e dia magno aki. Ademas di ponemento di krans, tabata tin un acto folklorico tambe unda cu e ciudadanonan Dominicano a baila riba Plaza Juan Pablo Duarte.
Tambe a honra tur esunnan cu a lucha cu awe Republica Dominicana por ta un pais liber, independiente y soberano.
Minister Glenbert Croes tambe tabata presente n’e acto aki, unda cu el a enfatisa cu e lasonan cu ta uni e pueblo Rubiano cu Dominicano. Den su discurso, el a resalta cu tin union familiar y cultural, comercial y hopi mas amplio entre Aruba y Republica Dominicana.
Durante e temponan di lucha di Libertador, un di e gran baluartenan politico y lider Dominicano, Jose Francisco Peña Gomez, a apoya Aruba den su lucha pa libertad.
E mandatario, den representacion di Gobierno, como Minister di Integridad, a gradici henter e colonia Dominicano residencia riba nos isla, pa nan aporte n’e economia di Aruba.
El a recorda e frase, ya cu niun hende mag di cansa di ripitie, ora cu e libertador a bisa cu “Arubiano no ta solamente esun cu a nace na Aruba, pero tambe esun cu a haci di Aruba su hogar, esun cu a intergra su mes den e sociedad Rubiano. E Arubiano ta esun cu, a pesar di no a nace na Aruba, ta celebra su 25 di januari y su 18 di maart.”
Pabien n’e colonia Dominicano na Aruba y rond mundo riba e dia special aki, cu nan ta celebra 180 aña di nan independencia.
