Drs. Michella van Loon, Rector di Colegio Arubano a entrega su retiro despues di apenas 2 aña den e funcion. Esaki ta pone cu un biaha mas e scol ta sin un Rector y ta trece cu ne diferente pregunta. Fundacion SMOA ta encarga cu maneho di e scol y parce cu, pa un of otro motibo, no por haya of no por traha cu ningun Rector, ni Hulandes ni Arubiano tampoco!
Prome cu docente di historia Michella van Loon a asumi e puesto di Rector di HAVO y VWO, pa mas o menos 3 aña e scol tabata funciona sin un dirigente fiho. E fundacion a manda Rector Timmermans cas na aña 2016, pasobra e no a resulta manera desea. Na aña 2018, Michella van Loon, un ex alumno di e scol, a asumi e puesto. Van Loon tin hopi experencia den enseñansa como docente na Colegio Arubano pero tambe tabata Rector na Avond HAVO y Avond VWO.
Cu retiro di Rector Van Loon memey di pleno crisis di Coronavirus, ta pone cu hopi ta puntando dede riba SMOA, indicando cu e fundacion lo ta culpabel. Tin ta sinti cu SMOA kier dirigi e scol na nan manera y no ta hayando un candidato cu lo ta facil pa dirigi.
Colegio Arubano tabatin un tempo pisa tras di lomba, manera entre otro menasa di tiramento di parti di un alumno di Mon Plaisir College. A nota cu Rectorada y docentenan a haya nan mes ta traha bou hopi presion. Claro cu esey ta haci studiamento bou di e alumnonan nada agradabel.
Hopi docente no ta contento cu locual ta pasando na Colegio Arubano. Dia 8 di september 2015 alumnonan a protesta contra e Rector, pero algun docente ta kere cu mester a core cu bestuur di SMOA e tempo ey y pa bini cu un otro cu si tin conocemento den enseñansa. Hopi docente a bay for di e scol sea pa bay traha na Colegio Arubano San Nicolas, DPS, na SKOA of den sector priva.