Ta parce cu asina cu ciudadanonan a tende cu desde diadomingo mester keda cas, cu tur hende a sali awe mainta direccion supermercado pa garantisa cu nan tin suficiente cuminda pa come den e siguiente dos simannan.
Pero separa di cuminda, a forma fila largo awe na Arugas na Barcadera pa garantisa cu tin gas tambe pa por cushina tur e cuminda cu a cumpra. Clientenan a conta nos cu nan a para tres ora den fila pa por a yega na turno pa a yena nan butishi di gas.
A nota clientenan cu butishi grandi y chikito. Por lo menos tres di nan a conta nos cu e chikito tabata pa “spare” por si acaso e “Lockdown” dura mas di loke ta anticipa y Arugas keda cera den tur e tempo ey.
