Diabierna ultimo, durante dos ora, corte a trata e caso penal contra Stephen Wilson, acusa di dood door schuld. Esaki ta relaciona cu e accidente fatal cu a sosode dia 2 di october 2022 den Colony. Den e accidente aki un mama cu su yiu a perde nan bida, mas un ruman muhe.
Durante e tratamento di caso a haci diferente pregunta na e acusado. Dado momento el a bisa hues cu e kier bisa famia di e victimanan algo. El a haci esaki tanto durante e caso como den su ultimo palabra.
Hues pa dolor di e famia e puntra nan si nan ta permiti pa e acusado lanta para y wak nan pa expresa su mes of nan ta prefera pa expresa su mes pero cara pa hues. Famia tabata prefera e ultimo opcion.
Stephen Wilson a bisa cu tur dia cu e habri su wowo, loke a pasa ta den su mente. No tin un dia cu e no ta pensa riba loke cu a pasa. “Mi ta desea boso hopi forsa. Ta duel mi masha hopi loke cu a pasa”, Stephen Wilson a expresa. Mas e cos aki ta duel su persona, segun el a bisa, pasobra e conoce e famia aki for di chikito, henter su bida e conoce nan. “Mi tambe tin yiu y sa si algo pasa cu ne e ta duel mi hopi. Mi ta pensa hopi cu tabata miho cu ami ta esun cu a muri den loke a pasa”, el a comenta.
Na final el a bisa cu e ta dispuesto pa yuda e famia cu loke nan mester y ta spera cu un dia e famia por pordon’e. Hues a pone e fecha tentativo di 11 di mei pa 2:00 pm, pa sentencia den e caso aki, unda cu fiscal a pidi un castigo di 4 aña.
Den casonan di morto pa culpa di un otro hende, sea den accidente of mata, e famia tin e opcion pa haci un demanda pa e gastonan a causa di e delito of pa daño of sufrimento emocional pa e sucedido. Pero e suma cu por otorga ta maximo 50 mil y masha poco te ainda a otorga e suma aki. E suma di mas halto cu a yega di otorga tabata esun di 10 mil florin den un caso di abuso sexual.
Banda di esaki, un victima of famia di un victima por haci un caso civil unda cu e suma por ta hopi mas halto, pero e ta un proceso mas largo cu den penal, unda un decision ta bin hopi lihe. Pa por haya un demanda durante un caso penal, principalmente e parti di d gastonan mester ta bon specifica cu recibo.
Den e caso di e accidente fatal a bin dos demanda, tanto di mayornan di Jessica y Joanne Wouters y e otro ta di tata di e menor, Rendrick, cu a fayece den e accidente fatal. E mama a papia di e gastonan di of relaciona cu entiero cu a yega total 34 mil florin. Seguro a paga un parti pero tin 19 mil florin cu nan mester a cubri. Y esaki a pidi pa ordena e acusado paga e gasto aki. E tata di e menor a haci demanda di 50 mil florin pa sufrimento a causa di e sucedido, tanto p’e como su otro yiunan cu a keda sin nan mama.
