Diaranson, 24 di april 2019, di 7’or pa 9.30 di anochi lo tin un actividad na Biblioteca Nacional Oranjestad dedica na celebracion di Dia Mundial di Derecho di Autor, Dia Mundial di Buki.
Ta un dia simbolico pa celebra literatura na henter mundo. Biblioteca Nacional Aruba, Departamento di Cultura Aruba, hunto cu Mirto Lacle lo presenta un programa multidisciplinario cu enfoke riba e diferente disciplinanan di literatura, arte, cultura, liguistica y educacion en general.
Lo enfoca riba e buki di Papiamento cu a keda re-edita 10 aña pasa pa Ralph Yarzagaray, El Papiamento, la lengua criolla …, la gramática más sencilla’ skirbi pa Dr. Rodolfo Lenz. E trilogia musica-canto-baile lo keda presenta en bibo. Lo demostra con palabra reihi na otro ta comberti den composicion poetico y ora agrega melodia na letra ta conduci na cantica/cancion y na coleccion di poema y cancion. Lo tin diferente presentacion, e.o. di Dj Caleto y su musica, presentacion di Frank Williams y Ronnie Kock.
Jossy Brokke y Grupo Melange bou di guia di Maybelline Arends-Croes lo deleita cu nan cancionnan. Musica y canto dedica na Padu del Caribe pa su di 99 cumpleaño. Lo recore e historia di ‘Bam canta’, ‘Nos ta canta’ te ‘Reluci, chispa musical’.
Un cordial invitacion na autornan y na publico en general pa asisti na e celebracion aki. Entrada ta gratis. Pa mas informacion por tuma cotacto cu Mirto Lacle tel. 7402044 of 7426274 E buki cu ‘Memorianan di Festival Voz-i-Landia Escolar’ lo ta obtenibel e anochi aki. ‘Books are at the intersection of some of the most essential human freedoms, primarily freedom of expression and freedom to publish.
These are fragile freedoms.’
