Banco Central di Aruba (BCA) a publica su rapport CORRUPTION SURVEY 2019. E rapport aki ta presenta e resultadonan mas importante di e encuesta di corupcion ehecuta door di BCA na aña 2019. E ta enfoca riba e percepcion di residentenan riba e situacion di corupcion, nan experiencia cu soborno den e 12 lunanan prome cu e encuesta y nan opinion riba na mesun rol y riba medidanan pa combati corupcion.
Frena corupcion ta un prioridad halto pa BCA, pasobra corupcion tin consecuencianan negativo economico y social cu por impedi BCA di cumpli cu su mision. Diferente oganisacionnan internacional, manera Tranparency International, ta ehecuta encuestanan riba e nivel di corupcion na diferente pais. Como cu Aruba no ta forma parti di e encuestanan internacional aki y pa cu e motibo ey data importante di corupcion no ta diponibel, BCA ta conduci e encuesta di corupcion desde 2018.
E resultadonan di e encuesta di 2019 ta mustra cu un gran mayoria di personanan encuesta tabata di opinion cu e problema di corupcion tabata hopi comun y creciente. Ademas, a percibi politiconan di ta e grupo den comunidad cu ta mas corupto y cu e esfuerzo di gobierno pa combati corupcion no ta efectivo. Notabel si ta cu segun e resultadonan di e entrevistanan e grado di soborno na Aruba ta abao compara cu paisnan selecta di Latino America y Caribe, ya cu poco di nan cu tabattin aceso na servicionan publico den e 12 luna prome cu e encuesta a indica di a paga soborno.
Sinembargo, algo menos cu un di cada 5 persona encuesta tabata conoce un persona cu a paga soborno ora nan tabatin aceso na servicionan publico. Un gran mayoria tabata di opinion cu hende comun por haci un diferencia den e lucha contra corupcion, mientras cu personanan encuesta a menciona cu e motibo principal pa no reporta corupcion ta cu hende tin miedo di e consecuencianan di esaki. Tambe, un gran mayoria ta percibi cu introduccion di un codigo di conducta pa ministernan y parlamentarionan ta necesario.
