Diahuebs mainta tabata aparece riba schedule di corte e caso penal contra Ingri Ramirez Rodriguez. E tin un acusacion basta serio contra dje pasobra a presenta un documento falso pa registra na Censo na Aruba.
Sinembargo e tratamento profundo no a tuma luga. E acusado femenino no a presenta mes na corte. Aunke inicialmente el a aparece riba lista di casonan sin cu e tin un abogado.
Diahuebs mainta por a compronde cu hopi recien el a haya un abogado y e profesional aki no tin ni un siman cu el a haya e documentonan y no tur cos tampoco. Pero suficiente pa e pidi pa pospone esaki y alabes haci algun peticion na corte.
Mr. Carlo tabata a insisti pa laga traha un rapport di diferente instancia, mirando e estado mental di su cliente y e problemanan mental cu el a bin ta sufriendo pa hopi tempo. El a duna un resumen cortico di kico a causa e problemanan mental di e señora, kende tabata casa cu un Musulman cu a bay su pais cu su dos yiunan cu nunca mas e señora a logra di haya of mira nan mas.
Pero fiscal no ta haya ni necesario pa haci mas investigacion pasobra “e storia ey ta conoci. Ta hopi hende cu a haci mescos tin tur sorto di problema cu nan a pasa aden. Conscientemente el a entrega un paspoort falso na Inmigracion y Duana ora cu el a drenta Aruba,” tabata e reaccion di fiscal.
Sinembargo hues a pospone e tratamento pa laga Reclassering traha un rapport y for di esey lo deduci si mester mas analisis di otro profesionalnan y si mester haci mas investigacion.
Pues a pospone pa tempo indefini y un hues cu ta atende cu casonan special di corupcion di politiconan lo atende e caso pa su tratamento.
E motibo ta cu e acusado femenino aki ta pareha di un funcionario halto den e cadena di husticia, esta Gino Winklaar, director di KIA y poni na disposicion di Warda Nos Costa.
