De Palm Tours, e unico operador di turismo certifica pa Earth Check na Aruba, ta anuncia cu orguyo e logro remarcabel di Anna Sit-Wong, kende ta celebra un increibel 50 aña di servicio cu e compania local ariba 20 di februari 2024.
For di dia cu a uni cu De Palm Tours ariba 20 di februari na aña 1974, Anna Sit-Wong a forma parti integral di e exito di e organisacion, nabega door di hopi cambio, incluyendo e adaptacion di tecnologia moderno, mientras manteniendo su compromiso pa excelencia den e departamento di contabilidad.
“A bin hopi cambio den con Anna ta haci su trabou, specialmente e factor mas grandi cual tabata tecnologia. Antes tur cos tabata haci manual, y despues a bin tecnologia. Anna ta traha den e departamento di payroll, kiermen e la pasa den hopi software di Payroll cu De Palm Tours mester a uza. Por bisa cu por lo menos 6 cambio di software y cada bes Anna mester a cuminsa siña ful di nobo pasobra cada software a bin cu su reto.
Asina mes Anna a sa di adapta su mes y embrace e novedad cu a bin cu e cambionan a pesar di no ta un persona technology driven pero asina mes Anna a gar’e cu dos man. P’esey mes mi kier kita mi sombre pa tur e adaptacionnan cu el a haci durante e añanan y cu e t’ey ainda trahando duro”, Ricardo Malmberg, Director di Hunta di Supervision di De Palm Corporation ta conta.
Den un epoca unda lealtad tabata mira, e devocion di Anna ta resplandece briyantemente, sirbiendo como un ehempel di compromiso. A pesar di ta un persona hopi keto y trankil, e agudo intelecto di Anna y su atencion meticuloso na detaye a pone cu el a gana e respet y admiracion di su coleganan rond di henter De Palm Tours. Como e persona calmo den e departamento di contabilidad, Anna tin e capacidad pa identifica y coregi fayonan, sigurando e precision y integridad di operacionnan di payroll.
Pa conmemora e logro monumental aki, De Palm Tours a expresa su aprecio na Anna pa medio di varios gestonan di gratitud. For di un fiesta sorpresa te na brindis di champagne, un “red carpet”, servicio di “vip”, desayuno cu e doñonan di compania, un banda mariachi, placa cash, un luga di parkeer permanente dedica na su persona, certificadonan como regalo, dianan di vacacion adicional, y ticket di aerolinea. Pero Anna, cu su naturalesa humilde lo tabata contento cu solamente un sonrisa y un handshake.
Mientras De Palm Tours ta celebra e extraordinario 50 aña di servicio di Anna, e compania ta reconoce como un simbolo di lealtad, resistencia, y dedicacion. Su capacidad pa adapta na cambionan mientras e ta keda leal na su balornan ta un testimonio di su caracter remarcabel y ta sirbi como inspiracion pa tur hende.
“Mi kier gradici Anna pa tur e añanan di servicio, lealtad, tur e trabou duro cu la haci pa e compania, pa a yuda nos yega na unda nos ta awe. Mescos cu un cas tin un fundeshi, Anna ta parti di nos fundeshi. Si no nos no lo ta unda nos ta awe”, Ricardo Malmberg a expresa.
Ban uni nos tur y felicita Anna Sit-Wong pa su logro extraordinario y expresa nos aprecio mas profundo pa su decadanan di servicio y compromiso pa excelencia. Su lealtad y contribucionnan a hunga un papel clave den forma e exito y legado di De Palm Tours, y nos ta warda cu anticipacion pa celebra hopi otro logronan hunto.
