Dia 29 di september proximo Stichting Monumentenfonds Aruba (SMFA) hunto cu Departamento di Cultura Aruba, Fundacion Museo Arubano, Fundacion Mi Cutisa y FEDAA lo ta organisando e actividad di Fiesta di Cunucu na Pos abou 19 pa celebra Aruba su casnan di cunucu durante e luna di monumento.
E di seis edicion di e Fiesta di Cunucu, ta bay ta combina tambe cu un momento special caminda cu durante e apertura oficial di e actividad Monumentenbureau, cual ta e departamento di gobierno encarga cu proteccion di monumentonan, lo pone e seyo oficial pa asina Cas Tan Tin keda oficialmente indica como un monumento proteha.
E Seyo ta fungi como un simbolo di identificacion pa henter comunidad cu e monumento concerni ta inscribi den e Registro di Monumento y ta keda bao proteccion segun ley. E simbolo ta refleha e forma parecido di un flor. Su nificacion den casnan decora ta “proteccion”, pues un proteccion pa e cas. Despues di segunda guera mundial, internacionalmente a tuma e color blauw pa medio di e “blue shield” pa identifica monumento. (info: Monumentenbureau).
E cas di cunucu aki a wordo construi na aña 1930 pa Sr. Mario Tromp y akinan a biba cu su neube yiunan. Sr. Tromp tabata traha na e refineria na Eagle y tambe tabata dedica na cultivo y pesca.
Recientemente Stichting Monumentenfonds Aruba a cumpra e cas di Cunucu aki pa asina por preserva esaki pa futuro generacionnan y lo ta e prome cas di Cunucu proteha na Aruba.
SMFA hunto cu tur e partnersnan di Fiesta di Cunucu ta invita un y tur pa bin celebra nos cultura y admira e bunita monumento aki cu su mueblesnan original y artefactonan interesante di Fundacion Museo Arubano diadomingo awor dia 29 di september. Lo tin un tremendo programa cultural varia y un mercado cu productonan local pa un y tur.
