“Nos a surpasa e expectativa,” ta loke cu Ronella Tjin Asjoe Croes, Chief Executive Officer di Aruba Tourism Authority (ATA), a bisa despues di yegada di e prome vuelo procedente for di Merca diabierna ultimo.
Cu musica di steelband a ricibi e prome bishitantenan Mericano cu a yega Aruba diabierna ultimo. E tabata un programa hinca den otro door di ATA. A surpasa e expectativanan den diferente sentido, e ehecutivo di ATA a bisa 24ora.com. Na inicio a papia cu den luna di juli por bay spera en total 7 mil bishitante, mientras cu den e prome week-end caba a haya 4 mil turista a yega Aruba.
Esaki ta nifica cu kisas cu luna di juli lo surpasa e cantidad calcula di 7 mil bishitante. Pero ATA toch ta keda cauteloso pasobra esaki ta e prome salida pa e mercado Mericano. ATA a compronde cu tabatin bon resultado pa diferente aerolinea cu ta ahustando nan schedule, cu kisas por nifica mas vuelo pa Aruba. Den e grupo cu a yega, no ta solamente “repeat visitors” a yega, pero tambe esnan cu a scoge Aruba pa prome biaha.
A haci hopi trabou pa Aruba ta debidamente prepara pa ricibi bishitantenan bek, cu un proceso nobo, pa garantisa un bon fluho, principalmente ora cu tin hopi bishitante yegando pareu. E experencia positivo cu e bishitantenan aki comparti riba rednan social, lo ta e miho propaganda pa Aruba. ATA ta gradici tur esnan cu a traha hopi duro den weekend pa asisti tur e bishitantenan cu a yega y pasa den e proceso nobo cu a implementa.
E impacto ta cu e weekend lo trece na ingreso entre 2 pa 2.5 miyon. Mester sigui haci esfuerso hunto, tambe comunidad, pa mira adelanto den esaki. “E ta un cifra cu kisas ta zona hopi, pero ta un comienso poco-poco,” e ehecutivo a expresa.
