Ta masha dia cu bombero no a atende un candela di e magnitud aki. Riba penultimo dia di luna di juli, tanto polis como brandweer a presenta cu urgencia na Bushiri p’un candela grandi. A ricibi informacion di un cas of edificio na candela. Na yegada di e prome patruya di polis, esta alrededor di 7:05 pm; a pidi mesora pa brandweer presenta cu maximo urgencia.
A constata cu e deposito di BBS Kitchen tabata na candela. Bushiri 30 ta e adres exacto. E origen di e candela no ta conoci ainda. Un cos ta sigur, el a expande di un forma lihe y tabata menasa e edificio.
Parti patras di e edificio ta caminda cu e candela tabata enfoca su mes. Mirando e situacion alarmante, a activa tur unidad di bombero na Aruba pa presenta na sitio. Tanto for di post Oranjestad (Oscar), Tanki Flip (Tango) y hasta San Nicolas (Sierra.)
Personal di N.V. Elmar tambe tabata un di esunnan cu presenta prome na sitio pa por kita coriente. E no a bay facil. A dura por lo menos un ora y mey di trabou pa por combati e candela feroz aki.
No mucho leu di e compleho, tabatin un otro candela a start. Esaki ta debi na e propio biento cu a contribui n’e candela net patras di New Canton Bar na Bushiri. Ey, tanto propietario como bisiña y ciudadano a yuda pa por paga e candela pa evita cu e ta bira pio. Cu slang, hemchi y santo; a logra domina e candela te ora cu bombero a yega.
