Den fin di siman a tuma luga un evento super exitoso den Centro di Bario Dakota (CBD). Ta papia aki di e evento di Hot Wheels cu tabata bou encargo di Gilmar Croes.
Hot Wheels ta e famoso autonan chikito cu ta masha popular bou di muchanan. Pero aparentemente no solamente muchanan ta impacta cu e autonan aki, sino adulto tambe.
Por a mira masha hopi hende grandi cu nan auto di Hot Wheels diasabra anochi den CBD. Segun Croes a splica, na momento cu actividadnan di careda di auto na Palo Margo a slow down, a surgi un hobby nobo di adultonan.
Asina a surgi e interes pa careda di Hot Wheels cu den pasado tabata popular caba, cu su mesun pistanan. Pero contrario cu den pasado, awendia tin diferente tipo di pista, traha cu diferente tipo di material. Por ehempel e pista di Dakota ta diferente cu esun na Papaya. E material tin influencia riba e performance di e autonan.
Tin material ta haci cu e auto ta bay mas rapido y otronan ta baha e velocidad. E retonan ta diferente. E participantenan ta inverti den diferente tipo di auto cu tambe ta traha di diferente tipo di material, manera esun di chumbo. E ta haci e careda interesante y crea mas acogida.
E autonan ta dividi den diferente categoria, segun nan peso. Den e competencia a Dakota tabatin por ehempel autonan di 45 gram. Ta autonan stock cu no por haci mucho cu nan. Esun interesante ta di 75 gram, pasobra esey si por yen’e cu chumbo y ta adapta e tirenan y dun’e mas velocidad. Diasabra tabata prome biaha cu a uza e categoria aki.
Muchanan ta uza Hot Wheels pa hunga, pero adultonan ta participa pa competi y gana, y inclusive por gana placa.
No mester lubida cu mayoria di e autonan cu ta competi, no ta haya nan cumpra na Chines. Mas bien ta trece nan for di exterior. Hecho ta cu tin auto di diferente tipo di peso y tur cos ta depende di e tuning. Cada doño ta atende cu su propio vehiculo pa pone den forma pa competi y gana.
