FADA tabata tin su campañanan durante e temporada di carnaval, cuminsando cu propaganda pa Amigo DiDi. E propaganda aki a bay mas riba un comportacion. Ta pa ilustra cu si bo bebe y no uza bo Amigo DiDi, e consecuencia ta loke a mustra tur e dianan aki. Detencion y encarcelacion.
Cindy Lacle, preventiemedewerker di FADA, a splica cu e campaña aki tabata un exito. Tambe nan a sigui cu nan carousel cerca diferente scol secundario, dunando informacion hunto cu otro fundacionnan.
Den e caso di FADA nan a toca e topico di alcohol, kico alcohol ta. A duna informacion riba kico por pasa a corto plaso y largo plaso. Tambe a duna hopi tools. Algo cu a bin na nota ta cu mayoria mucha a purba alcohol.
E alcohol aki a wordo introduci na nan door di un miembro di famia entre otro. E siguiente paso como fundacion ta no solamente organisa carousel pa e muchanan, pero tambe anochinan informativo pa loke ta e mayornan pa conscientisa nan y duna informacion kico alcohol ta haci na un hoben.
Por mira tambe e campaña nobo cu FADA a haci cu ROMAR, a ilustra tres video nobo. Un di nan ta e hendenan cu ta dicidi di consumi alcohol, pa tene na cuenta cu si bo dicidi di bebe alcohol, bebe otro bebidanan banda di dje, manera awa, juice of refresco y semper corda come.
A ilustra un otro video tambe cu por mira un tata, mama y su yiunan, pa asina no consumi alcohol rond di mucha. Loke e grandinan haci e muchanan tambe kier haci.
E ultimo video cu a saca ta ilustra un gang di amiga banda di beach. Un di nan tabata e Amigo DiDi. Esaki ta mustra cu no ta tur siman of tur biaha cu sali, e mesun persona ta e Amigo DiDi. Ta un tarea cu tur siman por cambia pa diferente persona, y pa percura pa tin un Amigo Didi.
E campaña en general a bay hopi bon y a haya bon reaccion. Algo cu por bisa di parti di FADA ta cu por mira e frutanan di loke a planta, cual ta Amigo DiDi, caminda cu por mira hopi hende para na banda, sinta tambe den auto cu tin un Amigo DiDi na stuur y e otro sinta na banda cu por ta bao di influencia di alcohol.
Sigur ta algo cu ta di aplaudi, cu por a mira hopi iniciativa priva pa loke ta trata ofrece transporte pa personanan cu ta bay parada of personanan cu ta den parada, pa hiba y busca nan. Tambe por a mira hopi hende cu ta busca nan Amigo DiDi. Ta algo sigur di aplaudi.
Boluntarionan
Aña pasa, Amigo DiDi, FADA, hunto cu fundacion Zinnia tabata tin cierto busnan. E aña aki organisatoriamente no a logra cu esaki. Pero si por a tuma contacto cu diferente compania cu tin bus, cu lo por haci esaki. Pero ta algo cu sigur nan ta traha riba dje pa otro aña pa brinda e servicio aki hunto cu otro companianan.
FADA ta uza hopi social media, mirando cu ta e manera mas facil pa yega na un persona. Loke ta purbando awor aki cu door di e videonan, pa nan yega na e comunidad di Aruba. Nan tin algun anochi informativo cu mayornan tambe, pero no directamente cu FADA lo ta riba caya pa loke ta e paradanan di carnaval.
Recomendacionnan
Sigur un conseho di Fundacion Anti Droga Aruba ta pa tur persona cu ta den carnaval y cu ta bay wak carnaval, corda tur decision cu bo haci awe, tin un consecuencia. Si bo dicidi di bay haci uzo di alcohol, corda come y bebe. Ta pidi encarecidamente pa no haci uzo di alcohol rond di mucha mirando cu loke nan ta wak nan por haci.
Y tambe uza bon bo Amigo DiDi. Si bo ta dicidi di bay parada y para na banda of ta den dje, corda bo Amigo DiDi. Tur hende kier yega cas sano y salbo, no solamente esnan cu ta den parada of na banda, pero tambe tin hende cu tin cu traha. Tambe tin hende cu no ta participa den carnaval cu por ta na beach of un otro caminda, cu nan tambe kier yega nan cas cerca nan famia y nan famia ta spera esakinan. Pa tur hende disfruta di carnaval sanamente.
