E proposicionnan cu Gabinete Wever-Croes a presenta na Raad van Advies (RvA) despues di COVID no ta duna un imagen di un vision macro-economico bon pensa. Ta obvio cu a haci un seleccion cla pa cierto interes publico. Naturalmente, a pasa prome y di dos aña for di e drama di COVID, unda tabatin tempo di restauracion necesario y claro…hende y recurso tabata limita y no tur cos por a sosode na mes momento. Pero e peliger di fragmentacion y gastamento di recurso t’ey semper, si nos no tin e meta largo den nos bista bon fiha.
E meta ta cu a largo plaso lo aumenta nos propio fortalesa y resiliencia, cu accion di maneho necesario pa reduci e vulnerabilidad p’e shocknan externo. Y si un parti di libertad di accion, posiblemente temporalmente, ta pusha na banda, esaki no ta nifica automaticamente un atake na autonomia manera ta bisa tanto biaha. Ta importante pa, den forma constructivo, traha riba nos forsa pa por actua mas independientemente den futuro.
Door di inverti conscientemente den areanan cu ta importante pa nos resistencia den futuro, e dependencia ta bay disminui paso pa paso y e autonomia ta bira mas fuerte. O sea: haci seleccion consciente pa interes publico cu ta strategicamente significante cu nos por ta mas fuerte riba nos mes a largo plaso y duna un contenido y ehecucion mas realistico n’e concepto di autonomia.
Den e contexto aki, RvA ta considera ‘un oportunidad perdi’, cu no ta purba pa tuma decision structural cu tin un apoyo mas amplio posibel. E confiansa den e decisionnan aki ta bira hopi mas grandi y di e manera aki tambe probecha uza tur conocemento local.
Fortalesa y autonomia ta un lansa y un escudo pa proteha y defende. Pero, nos mester tene bon na bista di ki interes ta trata y cua meta mester protege y defende.
Pa finalisa, RvA ta enfatisa cu e buskeda di un balansa entre resistencia y autonomia no ta nifica cu ta lubida logronan di pasado. Pero den un mundo cu ta cambia constantemente, nos mester mira speransa padilanti en bes di keda mira patras y mester scoge pa interes di nos futuro generacion.
