Den e prome dos simannan di aña nobo, e cuidadonan di cacho di e Team Extraordinario di Brigada di Cacho(BOT-K9) di KIA a pasa nan control di calidad y re-certificacion, cu ta tuma luga dos biaha pa aña.
Varios dia tras di otro e cuidadonan y nan cacho mester a demostra nan habilidadnan, manera saca detenido (arma) hopi peligroso for di cel, procedura ora di uza escudo (schild), buskeda den mondi, escolta ora di transporta detenido y control di problemanan di orden publico.
A evalua nan basa riba componentenan manera, capacidad di control, combinacion (di formacion), con balente nan ta y con confiabel nan ta.
Den 2018, e cachonan di vigilancia del BOT-K9 a drenta den accion diariamente, entre otro 549 biaha ora ta escolta transportacion di detenidonan di halto riesgo y 93 biaha como “back up” ora e team di asistencia interno den KIA drenta den accion.
