Awe mainta corte a dicta sentencia den e caso penal contra e hoben Brandon Beaumont. A acus’e di intento di asesinato, intento di mata of maltrato pisa. E echo aki a tuma luga dia 24 di october aña pasa.
E agresor no solamente tabata bou influencia di alcohol pero tambe di otro substancia.
Den e estado ey el a mira su victima como un persona cu kier a atac’e en bes di uno cu kier a salb’e di un problema.
E victima mirando e situacion a trata di huy, ora cu el a mira e cuchiu. Brandon a sigui su victima y a hinc’e. A pesar cu el a logra huy, a sigui su tras. Un biaha mas Brandon a alcans’e y e biaha aki a hinke tres biaha mas.
Tur problema a cuminsa na momento cu gang di Cayenastraat a topa cu esun di Pos Chikito y e victima, cu conoce ambos banda, a haya su mes memey di e problema ora cu hustamente e kier a evita.
Fiscal a pidi un castigo di 6 aña. Hues a yega na e conclusion cu e 6 añanan ta na su luga. Tambe a otorga un parti di e demanda di daño tanto pa e victima como mama di e victima. E resto por cuminsa un caso civil pa haya esaki.
Pa un relato mas amplio lesa siguiente edicion TREMPAN.
