No ta prome biaha cu e busnan di Arubus ta envolvi den accidente, por lo menos pa e mesun motibo. E brake ta faya y ta dal tras di otro otro. E biaha aki ta na Pos Chikito, prome cu yega rotonde di Pos Chikito.
E bus di Arubus carga cu studiante direccion Playa su brake a faya y a dal tras di un bus chikito color blanco marca Nissan y herida dos personal di Imeldahof. Den e bus chikito tabatin personal di Imeldahof, dos di nan a resulta herida, un sinta dilanti y un otro patras.
Den e bus di Arubus tabatin varios studiante di scolnan pariba di brug cu tabata direccion pa cas. Un otro bus di Arubus a presenta p’asina e studiantenan por yega cas sin ningun problema, aunke un poco laat. Daño material tabata basta, tanto na e bus como e bus chikito. E bus di Arubus su front a bay por completo y e windshiel a kibra por completo.
E bus chikito su porta di bahul a ricibi basta sla y e backshield tambe a kibra. Na final polis a presenta pa documenta e accidente aki. Ambulance a transporta e dos personanan cu a resulta herida pa hospital pa nan ricibi atencion medico avansa. Ta spera cu awo si Arubus por mantene nan busnan regularmente mirando cu no ta prome biaha cu brake di e busnan a faya riba caya.
