Dialuna 29 juni 2020 Wardacosta su Metal Shark tawata patruya den bisindario di Mangel Halto na momento cu nan a nota un boto di bela cu tawata pega riba rif di Mangel Halto.
Abordo di e boto di bela tawata tin diferente persona ta zwaai man pa pidi asistencia. E patruya di Metal Shark a dirigi su mes mesora na e direccion di e boto pa duna asistencia. E Metal Shark no por a yega cerca di e boto y a keda para di un distancia.
Algun personal di Wardacosta y milicia di Caribe a landa bay cerca di e boto pa investiga kico a pasa e boto y e hendenan abordo. Riba e boto ‘Be Brave’ tawata tin un famia di 7 persona di cual 4 persona menor di edad. E capitan tawata herida dor cu el a trapa riba un ‘zeeappel’ y no por a move su pia.
Mirando cu solo tawata baha a dicidi di manda un cabuya pa asina opera pa por saca e boto di unda e tawata pega, pero e intento pa saca e boto no a logra. A tuma decision pa baha e famia for di e boto pa no hinca nan den peliger y haci e boto bashi. E personal di Wardacosta a yuda e famia, cu cada uno cu nan ‘lifevest‘ bisti subi abordo di e Metal Shark.
Ora nan tur tawata safe riba e boto di patruya di Wardacosta nan boto di bela a lanta un tiki for di caminda e tawata pega riba e rif. A bolbe haci un intento pa purba un ultimo biaha pa saca e boto for di unda e ta pega. A logra saca e boto cu yudansa di personal di Wardacosta den lama pa asina haci menos daño posibel na e rif.
Despues cu a logra rescata e boto di bela ‘Be Brave’ a touw esaki hiba na Nikki Beach riba anker y a baha e famia na Renaissance marina unda cu e capitan di e boto lo mester a wordo transporta pa hospital dor di e famia pa e ricibi asistencia medico. Personal di Wardacosta ta desea e capitan un pronto recuperacion.
