Boticarionan ta hopi preocupa cu e decision tuma door di gobierno pa reduci e lista positivo di AZV. Ta trata aki di e lista di remedinan cu AZV ta cubri. Na momento cu introduci e cambio dia prome di februari awo, lo tin rond di 200 remedi cu AZV no ta bay cubri mas.
A combersa cu Sharon Arends – Bareño, Boticario na Botica Paradera. Repasando e decision tuma door di AZV nan a bin constata cu e cantidad di remedinan cu no ta bay cubri mas ta 240. “Ta basta hopi remedio y ta afecta e pashent hopi, y naturalmente e boticanan. Algun di nan lo compensa, si e pashent ta na man di un specialista.”
E ta alarmante, pasobra ta e remedinan cu mas ta uza. Hopi di nan ta remedinan cu ta uza pa drumi y cu solamente riba indicacion special ta cubri nan. Un gran parti di Aruba ta keda afecta pa e decision aki, principalmente den un temporada unda pueblo ta pasando den un situacion dificil.
E boticario a b isa “nos ta compronde cu mester bin medidanan, mirando e situacion, pero ta kita mas di 200 remedi y despues e pashent lo mester bay haci un contribucion propio tambe.”
Boticarionan ta sinti cu cada rato ta e pashent ta esun cu mas ta bay wordo afecta pa loke ta wordo cubri of no. Nan ta haya cu tin vet cu por wordo corta otro caminda prome cu afecta e remedinan di e pashentnan.
AZV aworaki ta costando Aruba 450 miyon florin pa aña pa 120 mil habitante. Di e suma menciona, 200 miyon ta bay na hospital so. Tin hopi vet pa corta na hospital prome. Nan ta haya cu mester purba corta otro caminda prome cu yega na e pashent cu ta sufriendo caba door cu no tin trabou. “Nos sa cu tur hende mester entrega y Boticanan a entrega caba 5.5%. E preocupacion awo ta e pashentnan.”
Un punto importante ta cu hendenan di Canada of Merca cu cumpra un cas na Aruba y inscribi na Censo, automaticamente ta bini na remarca pa un carchi di AZV. Esaki ta algo cu nan ta haya no ta na su luga, pasobra nan nunca a biba na Aruba. Si nan tin placa pa cumpra cas, mester laga nan cumpra un seguro apart. Pero tambe esnan cu ta bini temporalmente Aruba. Mester cambia e ley cu ta bisa cu solamente esnan cu tin nacionalidad Hulandes ta bini na remarca pa AZV. “Tin hopi caminda cu por corta sin afecta e homber chikito.”
Loke ta preocupacion ta cu dos di e remedinan mas uza ta bay wordo kita, cu ta e pildonan di drumi y remedi di stoma. Ta hopi hende ta sufri di acidez di stoma aki na Aruba. E ta hopi pa e pashentnan sac’e di nan mesun saco.
Otro punto cu el a señala ta cu por ehempel e gastonan di Boticanan ta 15 miyon florin pa aña. E ta compar’e cu AZV cu tin 90 empleado y nan gastonan di maneho ta 18 miyon florin. Pues 20 botica ta cobra 15 miyon florin pa aña y e gastonan di AZV pa 90 empleado ta 18 miyon florin. Tin pashentnan ta drumi hopi dia den hospital sin cu ta haci ningun test. Mester evalua tur esaki. “Mester haci cambio sin castiga e pashentnan”.
Si ta kita mas cu 240 remedi, nan ta cuminsa preocupa tambe pa e calidad di cuido medico cu lo bay atras. Si un pashent no tin placa pa cumpra remedi, e ta bira mas malo y dado momento e lo mester bay hospital cu lo costa mas placa. “Mester evalua tur e cosnan aki prome cu dicidi pa corta asina hopi.”
