Polis tin un team cu ta haci investigacion y nan ta inclina mas riba straat verkoop den bendemento di droga. Na Tarabana a detene e barbero y alabes cantante, Elvin “John” Lopez. A detene na su cas, situa na Macubaristraat 19, na Tarabana-Dakota.
Segun Lito Lacle, vocero di Cuerpo Policial Aruba (KPA), recherchenan a detene un persona y a confisca tanto droga como arma di candela. Mientras cu a detene e barbero, e agentenan policial tabata revisa den e cas pa mira kico mas por haya.
Elvin Lopez ta canta den e banda musical Mellow Band y ta traha como barbero na Superstar Barbershop situa na su cas mes. E ta un figura masha conoci den Dakota. Separa di canta y pela, e ta bende auto tambe cu e ta importa for di afo.
E K-9 unit a presenta na e sitio pasobra na momento di un entrada hudicial ta vries e luga. E unidad aki ta haci su trabou pa busca mas droga y pa por confisca nan. E departamento di BFTO tambe a presenta na e sitio, pasobra na momento di haya un arma di candela, nan ta documenta esakinan.
Tambe a conta cu presencia di varios patruya di polis, kendenan a presenta pa mantene e ordo publico mientras e otro departamentonan tabata haci nan investigacion.
