Lider di UPP, Booshi Wever ta poco preocupa cu algun desaroyo. E ta sigui e minister di labor hopi di cerca.
El a comenta cu den un articulo cu el a publica dos siman pasa riba kico ta pasando riba e tereno di refineria y a haya un reaccion di un minister, na unda cu e ta acusa gerencia, acusa e contratista Frances, cual lo ta hopi interesante pa sa ken ta e representante.
Wever a sigui splica cu a bin atak’e riba un manera di un relacion familiar cu supuestamente lo ta existi entre tur e contratistanan, pero no ta contesta su preguntanan. A haci hopi pregunta, pero e minister no ta contesta ningun. E ta purba di desvia di atencion.
Na momento cu algun siman pasa cu el a bin di vakantie, el a bin ta acusa miembronan di management team di DPL pa corupcion. Despues no a tende nada mas. Awo e ta bin ta acusa e gerencia di RdA, di Citgo, PDVSA, nan tur, pa a “scarmai” 114 miyon dollar, sin bisa nada.
Recientemente por a mira un firmamento di ultimo pida beach cu nos tin, unda cu por mira e dos Odubernan, un cu ta acusa e otro cu e ta haya placa den e maleta di Rosa y awo ta mira nan hunto. Wever ta puntra su mes si sr. Glenbert Croes, kico a pasa cu e no ta denuncia ladronnan di e 114 miyon dollar aki, cu al final, si Citgo tin motibo e bandona cu razon, nos pueblo ta para garantia pe. Nos pueblo ta para garantia pa e ladronicia aki y ningun hende ta bisa nada.
Sr. Glenbert Croes, na un manera infantil, kier a purba di desvia e atencion aki. Ora e pregunta ta, por ehempel, den RdA tin un contracto directo cu GTS pa e planta di Algae, cu no ta funcionando. Pero si ta gastando miles di florin, miles di dollar pagando pa e compania aki. Bo ta pagando un salario haltisimo pa un Curasoleño, Herbert Mensche. Nada no ta cuestiona. Bo ta bin keda teima riba algo cu no ta cierto. Berdad cu tin varios famia di Wever tin contratista den e refineria, pero no ta bay pa esey. Ta bay pa e ladronicia cu e mes a bisa. Wever no a bisa cu tin ladronicia. Ta e minister a bisa cu tin ladronicia.
Tin su colega minister di husticia, haci investigacion y ta scoge pa no haci’e.
E minister ta papia di ontheffing y Wever no a papia di ontheffing. Awo e tin cu prueba cu e no a firma ningun. Wever lo bay prob’e cu el a firma ontheffing. Esey ta e motibo pakico kisas e ta tilda e management team di corupcion, pero nunca el a bin cu un prueba. El a bay publicamente bisa esaki. Wever ta kere cu e debe hende drechi den e management team aki un disculpa a acusa nan di algo baho asina.
Sr. Glenbert Croes, spera cu e bin bek y Wever lo bin bek pe riba e acusacionnan cu el a haci pa e ladronicia cu tin eyden. Wever a bisa tambe cu den RdA cu tin hendenan cu ta untouchable y e director ta parce cu ta intocable. E minister mes a menciona cu tin hortamento y ainda e persona aki ta traha eynan cu un salario di 80 mil florin pa luna.
