Diabierna ultimo UPP tabata presente na LAR pa asina atende un “bezwaar” cu nos partido a entrega despues cu minister Otmar Oduber a nenga di duna copia di documentacion pa loke ta concerni e proyecto di “incinerator chikito”.
Ta un derecho constitucional di nos ciudadania di acuerdo cu articulo V.19 di nos constitucion y tambe di e ley di LOB, pa pidi informacion den cuadro di transparencia di gobernacion y asina promove bon gobernacion. Un di e formanan ta pa entrega un peticion pa haya copia y segun ley e minister en cuestion MESTER di tene cuenta cu e deseo di esun cu ta haci peticion. Den e caso aki Otmar Oduber a scohe pa djis laga nos wak den e documentonan, pero no kier duna copia y ni a permiti pa saca potret. Riba esaki, UPP a haci un “bezwaar” y Otmar Oduber a manda esaki pa LAR, cu lo tin di bay na duna un conseho na minister kico mester haci den e caso aki.
Boca afor, e minister aki ta grita cu e proyectonan ta transparente y cu e ta un persona cu no tin nada di sconde. Pero asina mes el a purba den tur forma pa tarda e proceso aki dor di warda te na ultimo momento pa duna “inzage”, pa despues tuma caminda di LAR. Y asina mes den e ultimo siman, despues cu LAR a yama e caso casi un luna prome, ainda ta manda DOW pidi pa un uitstel di e tratamento na LAR y durante di e caso e abogado priva a pidi esey tambe. UPP a nenga ambos. No tabata ningun sorpresa pa nos na momento cu diabierna cu e caso a ser presenta na LAR, minister Oduber a haya ta bon pa reacciona contra mi persona na un nivel personal, bisando tambe cu ta keda na dje, kico sea e conseho di LAR, pa bolbe nenga di duna e documento y cu si mi kier mi acudi na corte numa. Pues deliberadamente Otmar ta alarga e proceso aki pa nos haya e informacion den nos man. Esaki por “algo sera”!! En todo caso den su afan pa cumpli cu esnan den su cercania, e no ta “give a damn” ni pa tuma hendenan grandi haci, manera ta e caso di esnan cu ta atende cu LAR, contal e logra su meta, esta pa desvia e atencion y tranca e proceso pa haya transparencia. Ta mas cu obvio, manera nos a mustra caba, cu Otmar ta haci tur lo loke ta na su alcanse pa UPP no haya copia y asina desenmascare.
E modus operandi di Otmar lo ta den e caso aki pa alarga e proceso pa haya e documentacion y cu di e forma ey nos no por caba di mustra cu e proyecto di “incinerator chikito” tin corupcion aden y previlegiamento di compinchi y amigonan. Na momento cu nos por mustra esaki, e ora esaki lo hustifica tambe e duda cu nos tin den proceso pa yega na e “incinerator grandi”. Trancando esaki, ta dune tempo pa termina cu e proceso di otorgacion di e proyecto pa un “incinerator grandi” na su “escohido”, mientras ta purba na soborna otronan pa keda afor.
Definitivamente mi ta convenci cu Otmar tin hopi di sconde y p’esey e ta actua manera e ta actua. Siguramente na momento cu e baha na nivel personal, ta muestra cu e no tin pia mas pa para ariba. Y aki nos ta referi na su mesun pensamentonan cu el trece dilanti den e programa di Ivo Yanez, esta “Bou Palo”, bisando cu e no ta un hende cu ta baha na nivel ora no tin discusion mas. Esun cu haci esaki ta purba di haya credibilidad dor di ataca e otro personal. Y asina el acusa su “ex-partners in crime” berde como MENTE POLLO, incluso hasta como MENTE POLLO CHIKITO. Ni un siman despues di a expresa esaki, Otmar himself, a duna muestra di ta un politico MENTE POLLO, bahando di nivel. Esaki pasobra e no tin hustificacion pa su actonan ni tampoco no por sigui discuti. Y manera e mes a bisa, cu na momento cu un hende recuri na atake personal y baho ta muestra cu esun cu ta haci esaki, no ta sigur di su mes.
Den su reaccion MENTE POLLO, Otmar ta acudi na purba di desacredita e mensahero cu insinuacionnan cu no tin nada di haber cu e issue. Si Otmar kier recuri na ataca mi persona personalmente mi respuesta lo ta “be my guest”, pero for di e declaracion di Otmar mi ta saca afo cu e su intencion ta pa hasta mata e mensahe tambe. Otmar a eludi, cu si LAR conseha mes cu UPP tin tur derecho pa haya copia, e lo “lap” esaki “aan zijn laarzen”! Tipo di actitud arogante y di omnipotencia asina ta hustamente e ingredientenan cu ta haci cu Hulanda ta a punto di interveni. Hulanda no tin confiansa den palabra, pasobra accionnan ta papia un diferente lenga y pa colmo parlamento ta den soño profundo ora ta toca e minister aki. Otmar, stop di “beat around the bush” y djies entrega copia pa UPP por prueba con corupto bo ta!!! Be a man, not a cacarouch!!
