Landsrecherchenan Aruba ta investiga filtramento di informacion den BC di Corsou y Sint Maarten

Den prensa Hulandes a keda publica cu Ministerio Publico (OM) di Corsou a entrega e investigacion di Landsrecherche Corsou, riba leakmento di informacion door di Banco Central y su director presidente interino Leila Matroos-Lasten, na OM di Aruba.

Segun e publicacion di Koninkrijksrelaties.nu, esaki ta sosode pa garantisa e integridad, imparcialidad y independencia di e investigacion. E motibo di e investigacion aki ta e denuncia haci door di Carlos Monk, den luna di mei, den nomber di partido oposicion “Korsou di nos Tur”, contra Banco Central di Corsou y di Sint Maarten.

Nan tabata di e pensamento cu e banconan a viola e ley di screening y e obligacion di secrecia cu ta aparece den “Landsverordening Toezicht Bank- en Kredietwezen 1994”, pasobra a comparti informacion confidencial en pugna cu ley na momento di screen un candidato pa Minister.

OM di Corsou, nan ta sigui bisa, a tuma e denuncia na serio y riba ordo di PG e seccion di Landsrecherche a cuminsa cu un “Feitenonderzoek” basa riba e denuncia. Apesar cu e investigacion aki no ta cla ainda, a dicidi pa laga Ministerio Publico di Aruba sigui cu e investigacion.

“OM ta para pa investigacion integro, independiente, y imparcial. P’esey nan tin motibo pa no crea ningun duda riba integridad y imparcialidad di e investigacion. “ OM den un declaracion duna ta seña cu recientemente informa a keda publica den diferente media cu bou di presion di Parket di PG a parti cierto informacion. Como cu Landsrecherche mester haci nan trabou bou di ordo di PG y resultado di e “feitenonderzoek” no ta mucho cla ainda, e resto di investigacion ta bay cay bou di Landsrecherche Aruba bou guia di PG reemplasante.” Manera ta conoci, Alexander van Dam a bandona Aruba y ainda e puesto ey no ta ocupa.

Carlos Monk, a ocupa diferente biaha e puesto di Minister y na 2010 e tabata lider di partido Niun Paso Atras (NPA).