Diahuebs tur hende a sali core rond cu nan famia en busca di diferente actividad celebrando Dia di Betico. Museo Historico, miho conoci como Fort Zoutman, tambe tabata un di e luganan cu a wordo bon bishita durante e festividad aki.
Riba e dia aki, mas di 700 persona a pasa pa disfruta di e ambiente y e dushi cosnan di come cu tabata tin. Museo Historico a cuminsa su actividad cu e hisamento di bandera cual a wordo hisa door di Grupo Scout Casibari y en conhunto cu Ronwayne Kock y full e team di e museo y e boluntarionan a canta e Himno di Aruba. Despues di esaki, museo a habri su portanan pa publico pa 10’or di mainta y e ambiente festivo a sigi te cu 4’or di atardi. Durante e actividad, tanto local como turista por a pasa pa disfruta di un dushi paella traha door di Chef Andrew di Blue Barrel of a purba un di e sabroso sopinan cu tabata tin y cu a bai manera pan cayente. Mauchi’s Smoothies y e mesanan di cos dushi tambe a sa di atrae hopi hende e dia aki. Hopi hende tambe a pasa bishita e museo pa asina por a participa na e segundo Selfie Scavenger Hunt cu a wordo organisa en conhunto cu e otro museonan cu ta cai bou di Fundacion Museo Arubano, esta Museum of Industry y Community Museum. E ganadornan lo wordo anuncia diabierna 9 di februari.
Full e team di Museo Historico kier a gradici tur persona cu a saca tempo pa pasa bishita e museo. E ambiente tabata uno yena cu alegria y hopi curiosidad pa cu e museo. Un danki grandi ta bai tambe na Balashi, Superfood, Glenn’s Place, The Old Cunucu House, Driftwood, Peanuts, De Palm Tours, Antesala y Bernadeta Gomez ja cu sin nan ayudo e evento aki no tabata posibel. Tambe mester gradici Amber Eline Kock cu a zorg pa e boluntarionan haya un dushi cuminda. Un danki hopi special ta bai na tur e boluntarionan cu a yuda e team pa asina percura pa tur cos a bai bon durante e evento. Masha danki Sheliziah Snijders, Francis Tromp, Enrique Mathilda, Juan David Oduber, Destiny Maduro, Marushka Hannoeman, Arabella Reyes, Gelou Wever, Ali Suarez, Nancy Lemmers, Shaneidee Rosaria y Genesis Tromp.
